ကရင်ပြည်နယ်၊ ဖာပွန်(မူတြော်)ခရိုင်၊ တပ်မဟာ ၅ နယ်မြေအတွင်း ဇွန်လ ၁ လတာအတွင်း စစ်ကောင်စီတပ်နဲ့ KNLA တပ်တို့ တိုက်ပွဲပေါင်း ၁၂၀ ကျော်ဖြစ်ပွားခဲ့တယ်လို့ ဇူလိုင် ၄ ရက်မှာ KNLA တပ်မဟာ ၅ က ထုတ်ပြန်ပါတယ်။
ဇွန် ၁ ရက်ကစပြီး ၃၀ ရက်အထိ နှစ်ဖက်တိုက်ပွဲအတွင်း စစ်ကောင်စီတပ်ဘက်က အယောက် ၆၀ ကျော်သေဆုံးကာ ၁၉ ယောက် ထိမှန်ဒဏ်ရာရရှိခဲ့ပြီး ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ ၅ ဘက်က ရဲဘော် ၂ ယောက် ကျဆုံးပြီး ၃ ယောက် ထိမှန်ဒဏ်ရာရရှိခဲ့တယ်လို့ ဆိုပါတယ်။
တပ်မဟာ ၅ နယ်မြေအတွင်း ဆုံးရှုံးထားတဲ့ စစ်ကောင်စီတပ်စခန်းတွေကို ပြန်လည်ရယူဖို့ စစ်ကောင်စီတပ်ဘက်က ကြိုးစားလာတာကြောင့် တိုက်ပွဲတွေဖြစ်ပွားခဲ့တာလို့ တပ်မဟာ ၅ ပြောခွင့်ရ ဗိုလ်မှူးကြီး စောကလယ်ဒို က ပြောပါတယ်။
“KNLA ဘက်က စစ်ကောင်စီတပ်စခန်းတွေ သိမ်းထားတော့ သူတို့ စခန်းပြန်လည်ရရှိဖို့ စခန်းထဲနေပြီး ပြန်လာတိုက်တယ်။ မကြာခဏ လာပြန်တိုက်တော့ တိုက်ပွဲတွေဖြစ်တယ်။ ပြီးရင် သူတို့ စခန်းထဲ ပြန်ဝင်သွားတယ်။ ၁ ရက် ၂ ရက်အတွင်း ထပ်ပြီးတက်လာတယ်။ တိုက်ပွဲတွေ ဖော်ဆောင်တယ်။ အဲလို သူတို့လှုပ်ရှားတာပဲရှိတယ်။ အဝေးက စစ်ကြောင်းလှုပ်ရှားတာတော့ မရှိဘူး။”
တပ်မဟာ ၅ နယ်မြေအတွင်း တိုက်ပွဲကြီးငယ်ပေါ် မူတည်ပြီး စစ်ကောင်စီက လေကြောင်းကနေ ပုံမှန်လာရောက်ပြီး ပစ်ကူပေးတိုက်ခိုက်တာ ရှိတယ်လို့ တပ်မဟာ ၅ ပြောခွင့်ရ ဗိုလ်မှူးကြီး စောကလယ်ဒိုက ပြောပါတယ်။
နှစ်ဖက်တိုက်ပွဲအတွင်း စစ်ကောင်စီက လေကြောင်းကနေ ဂျက်လေယာဉ်နဲ့ အပြစ်မဲ့ပြည်သူတွေ အသက်မွေးဝမ်းကျောင်းပြုနေတဲ့ လယ်ယာ၊ တောင်ယာ၊ ဥယျာဉ်ခြံမြေတွေအတွင်းကို ဗုံးသီး ၆၀၀ နီးပါး ကြဲချတိုက်ခိုက်ခဲ့တဲ့အပြင် ဒရုန်းဗုံး ၇၀ ကြဲချခဲ့တာကြောင့် ပြည်သူနေအိမ် ၄ လုံး၊ ဘုန်းတော်ကြီးကျောင်း ၁ လုံးနဲ့ စာသင်ကျောင်း ၁ ကျောင်း ထိမှန်ပျက်စီးခဲ့တယ်လို့ ဆိုပါတယ်။
ဧပြီ ၂၄ ရက်နေ့က ဖာပွန်မြို့အခြေစိုက် ခမရ ၄၃၄ တပ်ရင်းကို KNLA ပူးပေါင်းတပ်ဖွဲ့တွေက တိုက်ခိုက် သိမ်းပိုက်ခဲ့တာကြောင့် ခလရ ၁၉ အပါအဝင် တပ်ရင်း ၂ ခုကို အပြီးသပ်သိမ်းပိုက်ရရှိထားပါတယ်။
ဆက်လက်ပြီး ခမရ ၃၄၀၊ ခမရ ၃၄၁ နဲ့ ဗျူဟာကို KNLA ပူးပေါင်းတပ်ဖွဲ့တွေက တိုက်ခိုက်ခဲ့ပြီး ဝိုင်းဝန်းပိတ်ဆို့ထားတယ်လို့ တပ်မဟာ ၅ တာဝန်ရှိသူဆီက သိရပါတယ်။
