တူရကီရဲတပ်ဖွဲ့ဟာ နိုင်ငံတွင်းက အဖိုးတန် အဆိပ်ပြင်းပင့်ကူတွေနဲ့ ကင်းမြီးကောက်တွေကို ခိုးထုတ်ဖို့ ကြိုးစားတဲ့ သံသယရှိသူ အမျိုးသားတဦးကို ဖမ်းဆီးခဲ့ကြောင်း နိုင်ငံပိုင်မီဒီယာက မေ ၁၃ ရက်မှာ ထုတ်ပြန်ခဲ့ပြီး အဲဒီသူဟာ နယူးယောက်ရှိ အမေရိကန် သဘာဝသမိုင်းပြတိုက်က ပြတိုက်မှူးဖြစ်နေကြောင်းလည်း ဖော်ထုတ် ပြောဆိုခဲ့ပါတယ်။
ရဲတပ်ဖွဲ့ဟာ မေ ၁၂ ရက်က သံသယရှိသူကို အစ္စတန်ဘူလ်လေဆိပ်မှာ ဖမ်းဆီးခဲ့ပြီး သူ့ရဲ့ ခရီးဆောင်အိတ်ထဲမှာ တရန်တူလာ အမွေးထူ ပင့်ကူကြီးမျိုးတွေ အပါအဝင် ကင်းမြီးကောက်နဲ့ ပင့်ကူအကောင်ရေ ၁,၅၀၀ လောက် ထည့်ထားတဲ့ အိတ်ဒါဇင်ပေါင်းများစွာ အပြင် ဒါဇင်နဲ့ချီတဲ့ ပလတ်စတစ်ပုလင်းတွေထဲမှာလည်း အမျိုးအမည် အတိအကျမသိရတဲ့ အရည်တွေ ထည့်ထားတာတွေကိုလည်း သိမ်းဆည်းရမိခဲ့ကြောင်း ရဲတပ်ဖွဲ့က ပြောပါတယ်။
သံသယရှိသူဟာ တရားမဝင်ကုန်ကူးမှု တားဆီးနှိမ်နင်းရေး ဥပဒေနဲ့ ရင်ဆိုင်ရမှာဖြစ်ပြီး အမည်ဖော်ပြခြင်း မပြုဘူးလို့လည်း ဆိုပါတယ်။
နိုင်ငံပိုင် အနာဒိုလူ သတင်းဌာနက သံသယရှိသူဟာ သမိုင်းဝင် အမေရိကန်ပြတိုက်ရှိ ပြတိုက်မှူး လော်ရန်ဇို ပရန်ဒီနီ ဖြစ်တယ်လို့ ကြေညာခဲ့ပြီး သတင်းရင်းမြစ်ကိုတော့ မဖော်ပြခဲ့ပါဘူး။
အမေရိကန် သဘာဝသမိုင်းပြတိုက်ကို မှတ်ချက်ပေးဖို့ တောင်းဆိုချက်ကို ချက်ချင်း တုံ့ပြန်ခြင်းမရှိခဲ့ဘဲ ပရန်ဒီနီကိုလည်း ဆက်သွယ်လို့ မရပါဘူး။
ဖမ်းဆီးရရှိထားတဲ့ အကောင်နမူနာတွေဟာ တူရကီမှာပဲ ပေါက်ပွားရှင်သန်တဲ့ တိရစ္ဆာန်တွေ ဖြစ်ကြောင်းနဲ့ သူတို့ရဲ့ DNA ကို ကူးယူနိုင်ပြီးတော့ သူတို့ရဲ့အဆိပ်တွေကိုလည်း ဆေးဝါးထုတ်လုပ်ရာမှာ အသုံးပြုဖို့အတွက် နို့ရည်ထုတ်ထားကြောင်း ရဲတပ်ဖွဲ့က ပြောပါတယ်။
ဒီဆေးတွေဟာ ငွေကြေးတန်ဖိုး အလွန်မြင့်မားတယ်လို့ နားလည်ထားတာကြောင့် ဒီတိရစ္ဆာန်မျိုးစိတ်တွေကို နိုင်ငံရပ်ခြား သယ်ဆောင်ခြင်းကို တင်းတင်းကျပ်ကျပ် တားမြစ်ထားပါတယ်လို့လည်း ဆိုပါတယ်။
ကင်းမြီးကောက်အဆိပ်က ရရှိတဲ့ ဆေးတလီတာရဲ့ စျေးကွက်တန်ဖိုးမှာ ဒေါ်လာ ၁၀ သန်း တန်ဖိုးရှိကြောင်း သုတေသနပြုချက်အရ သိရပါတယ်။
Source/Photo-Reuters
