စစ်ကောင်စီတပ်က ဗိုလ်ကြီး ၁ ယောက်နဲ့ တပ်ကြပ် ၁ ယောက်တို့ဟာ လက်နက်ခဲယမ်းတွေနဲ့အတူ အလင်းဝင်ရောက်လာတယ်လို့ သက်ဆိုင်ရာ တော်လှန်ရေးတပ်တွေဆီက သိရပါတယ်။
မုံရွာခရိုင်၊ တပ်ရင်း ၂၅ (သံမဏိ Force - MPDF Battalion) ဆီကို မေ ၈ ရက်နေ့မှာ ဗိုလ်ကြီး ၁ ယောက် လက်နက်ခဲယမ်းတွေနဲ့အတူ အလင်းဝင်ရောက်လာတယ်လို့ တပ်ဖွဲ့တာဝန်ရှိသူတယောက် ပြောပါတယ်။
“အခြေအနေအကြောင်းကြောင်းကြောင့် စစ်ကောင်စီတပ်က အလင်းဝင်လာတဲ့ ဗိုလ်ကြီးရဲ့ အချက်အလက်ကို လျှို့ဝှက်ပေးထားတာပါ။ သူ့ကိုလည်း လုံခြုံစိတ်ချရတဲ့နေရာကို ပို့ဆောင်ပေးထားပါတယ်” လို့ ပြောပြပါတယ်။
စစ်ကောင်စီတပ်ကနေ အလင်းဝင်ရောက်လာတဲ့ ဗိုလ်ကြီးအဆင့်ရှိသူနဲ့အတူ MA 3 သေနတ် ၁ လက်နဲ့ ကျည်အနည်းငယ်ပါလာတယ်လို့ သိရပါတယ်။
ချင်းပြည်နယ်၊ မင်းတပ်မြို့ ခလရ ၂၇၄ မှာတွဲဘက်တာဝန်ထမ်းဆောင်တဲ့ ကျောက်ထုမြို့ အမြောက်တပ် အမှတ် ၃၆၈ က တပ်ကြပ်အဆင့်ရှိသူ တယောက်ဟာလည်း လက်နက်ခဲယမ်းတွေနဲ့ မေ ၅ ရက်မှာ အလင်းဝင်လာတယ်လို့ CDF-Mindat ဆီကနေ သိရပါတယ်။
CDF-Mindat ရဲ့ တာဝန်ရှိသူတဦးက “အကြမ်းဖက်စစ်ကောင်စီတပ်က တပ်ကြပ် ဝင်းလေး က လက်နက်ခဲယမ်းတွေနဲ့ ကျနော်တို့ CDF-Mindat ဆီကို အလင်း၀င်လာလို့ ဆုကြေးငွေ သိန်း ၅၀ ချီးမြှင့်လိုက်ပြီး လုံခြုံတဲ့နေရာကို ပို့ဆောင်ပေးထားပါတယ်” လို့ ဆိုပါတယ်။
အလင်းဝင်ရောက်လာသူ တပ်ကြပ် ဝင်းလေးဟာ MA 3 သေနတ် ၁ လက် ၊ ကျည်အိမ် ၃ ခုနဲ့ ကျည် ၂၅၆ တောင့်တို့နဲ့အတူ အလင်းဝင်ရောက်လာတာလို့ ဆိုပါတယ်။
ပြည်သူဘက်ကို ပူးပေါင်းလိုကြတဲ့ စစ်ကောင်စီတပ်ဖွဲ့ဝင်တွေအနေနဲ့ နီးစပ်ရာ တော်လှန်ရေးတပ်တွေကို အမြန်ဆုံးဆက်သွယ်ပြီး အလင်းဝင်ရောက်ကြဖို့ ဖိတ်ခေါ်ထားတယ်လို့လည်း သိရပါတယ်။
