ပဲခူးတိုင်း အုတ်တွင်းမြို့နယ် မဲကုန်းရပ်ကွက် ကံတော်ဘုန်းကြီးကျောင်းမှာ ဧပြီ ၁၁ ရက် ည ၈ နာရီခွဲလောက်က လာရောက်တည်းခိုတဲ့ အမျိုးသားရေးလှုပ်ရှားတဲ့ ဘုန်းကြီးနှစ်ပါးက အရက်မူးပြီး ကျောင်းထိုင်ဆရာတော်ကို ဓားနဲ့ခုတ်ဖို့လုပ်တာကြောင့် ရဲက ဖမ်းဆီးသွားတယ်လို့ မြို့ခံတွေဆီက သိရပါတယ်။
"ကံတော်ဘုန်းကြီးကျောင်းက မဟုတ်ဘူး မဘသကိုယ်တော်တွေ၊ ပဲခူးသံဃနာယကခွင့်ပြုချက်နဲ့ ကျောင်းမှာလာတည်းတာ။ ဘုန်းကြီးကျောင်းမှာ အရက်မသောက်ဖို့ ကျောင်းထိုင်က ပြောတာ။ တပါးက ဓာနဲ့ခုတ်ဖို့လုပ်တယ်၊ နောက်တပါးက ရိုက်ဖို့လုပ်တယ်။"
အဆိုပါဘုန်းကြီး ၂ ပါးမှာ လွန်ခဲ့တဲ့လက ပဲခူးမြို့အတွင်း တပ်မတော်ကြိုဆို ထောက်ခံပွဲတွေအတွက် ရောက်ရှိနေတဲ့ အမျိုးသားရေးလှုပ်ရှားတဲ့ ဘုန်းကြီးတွေဖြစ်ပြီး ပဲခူးမြို့နယ်သံဃနာယကဥက္ကဋ္ဌက အုတ်တွင်းမြို့နယ် ကံတော်ကျောင်းတိုက်မှာ သီတင်သုံးဖို့ ညွှန်ကြားခဲ့တာလို့ အုပ်ချုပ်ရေးနဲ့နီးစပ်သူတဦးက ပြောပါတယ်။
“ညက ရပ်ကွက်ကရော၊ ဘုန်းကြီးကျောင်းကပါ ဝိုင်းဖမ်းပြီး ရဲလက်ကိုအပ်လိုက်တာ။ ရဲစခန်းက အမှုဖွင့်ထားတယ် ရပ်ကွက်က မဘသဘုန်းကြီးနှစ်ပါးကို ဒေါသထွက်နေတယ်။”
လတ်တလော အုတ်တွင်းမြို့မရဲစခန်းက ဘုန်းကြီး ၂ ပါးကို လူဝတ်လဲကာ သာသနာ ညှိုးနွမ်းစေမှု ပုဒ်မ ၂၉၅/၂၉၅-က နဲ့ အမှုဖွင့်အရေးယူထားတယ်လို့ ရဲစခန်းနဲ့နီးစပ်သူတွေဆီက သိရပါတယ်။
