သုံးစွဲသူတွေက Private/Incognito Mode နဲ့ တိတ်တိတ်ခိုးကြည့်ထားတာတွေကို Google က လျှို့ဝှက်မှတ်တမ်းတင်ထားတယ်လို့ စွပ်စွဲထားတဲ့ တရားစွဲဆိုမှုတခုမှာ အချက်အလက်မှတ်တမ်း ဘီလီယံနဲ့ချီပြီး ဖျက်ဆီးပေးဖို့ Google ဘက်က သဘောတူလိုက်ပါတယ်။

Google ရဲ့ Chrome Browser မှာ “Incognito” ပြောင်းပြီးပဲဖြစ်ဖြစ် တခြား Browser တွေမှာ “Private Browsing” ပြောင်းပြီးပဲဖြစ်ဖြစ် သုံးစွဲရင် ကိုယ်သုံးစွဲတဲ့မှတ်တမ်းကို ဘယ်သူမှ မသိနိုင်ဘူးလို့ အများစုက ယူဆထားကြတာပါ။

ဒါပေမဲ့ Google က ဒီလို အချက်အလက်တွေကိုပါ မှတ်တမ်းရယူထားခဲ့တယ်လို့ စွပ်စွဲခံရတာ ဖြစ်ပါတယ်။

အဲဒီလိုလုပ်ခြင်းအားဖြင့် သုံးစွဲသူတွေရဲ့ မိတ်ဆွေတွေ၊ နှစ်သက်တဲ့ အစားအသောက်၊ ဈေးဝယ်တဲ့အကျင့် စတာတွေအပြင် အွန်လိုင်းမှာရှာဖွေတဲ့ “အတွင်းကျကျကိစ္စတွေ၊ အများသိရင် ရှက်စရာကိစ္စတွေ” ကိုပါ Google က အချက်အလက် ကောက်ယူနိုင်ခဲ့တယ်လို့ တရားလိုတွေက စွပ်စွဲထားပါတယ်။

၂၀၁၆ ဇွန် ၁ ရက်နောက်ပိုင်း သုံးစွဲမှုမှတ်တမ်း မယူဘူးဆိုတဲ့ private browsing ကို အသုံးပြုခဲ့တဲ့ သန်းနဲ့ချီတဲ့ Google သုံးစွဲသူတွေ ကိုယ်စားပြု တရားစွဲဆိုမှုကို ၂၀၂၀ က စတင်ခဲ့တာ ဖြစ်ပါတယ်။

အခုအခါမှာတော့ Google က ဒီလိုအချက်အလက်တွေ ဖျက်ပေးရင် အမှုကျေအေးပေးမယ့် သဘောတူညီချက်ကို ကယ်လီဖိုးနီးယားပြည်နယ် ဖက်ဒရယ်တရားရုံး၊ အုတ်ကလန်ကို တင်သွင်းခဲ့တာ ဖြစ်ပါတယ်။

ဒီအမှုအတွက် တရားလိုရှေ့နေတွေက နစ်နာကြေး ဒေါ်လာ ၇ ဒသမ ၈ ဘီလီယံအထိ တန်ဖိုးသတ်မှတ်ထားပါတယ်။

အခုကျေအေးမှုမှာ Google ဘက်က နစ်နာကြေးပေးမှာ မဟုတ်ပေမဲ့ သုံးစွဲသူတွေ တဦးချင်းအနေနဲ့ နစ်နာကြေးရဖို့ ထပ်တရားစွဲနိုင်မှာ ဖြစ်ပါတယ်။

အခု ကျေအေးမှုအရ Google က Private Browsing နဲ့ သုံးတဲ့သူတွေရဲ့ အချက်အလက်ကို ဘယ်လို ကောက်ယူတယ် ဆိုတဲ့အကြောင်း အသေးစိတ်ကိုပါ ရှင်းလင်းပြရမှာ ဖြစ်ပါတယ်။

Source/Photo-Reuters