ချင်းပြည်ကာကွယ်ရေးတပ်-ကလေး၊ ကဘော်၊ ဂန့်ဂေါ (CDF-KKG) တပ်ရင်း-၁ ရဲ့ အခြေခံစစ်ပညာသင်တန်းအပတ်စဉ်-၂ သင်တန်းဆင်းပွဲကို  မတ် ၂၈ ရက်က ပြုလုပ်ခဲ့တယ်လို့ CDF-KKG တာဝန်ရှိသူက ပြောပါတယ်။

ကလေးမြို့နယ်ထဲက CDF-KKG ထိန်းချုပ်နယ်မြေမှာ ပြုလုပ်ခဲ့တာဖြစ်ပြီး အခြေခံစစ်ပညာသင်တန်းမှာ စစ်ရေး၊ နိုင်ငံရေးပညာရပ်တွေကို သင်တန်းကာလ ၅၅ ရက်ကြာ သင်ကြားပေးခဲ့တယ်လို့ သိရပါတယ်။

သင်တန်းသား ၂၀ ယောက်၊ သင်တန်းသူ ၄ ယောက် စုစုပေါင်း ၂၄ ဦး တတ်ရောက်သင်ကြားခဲ့တယ်လို့လည်း သိရပါတယ်။

CDF-KKG ပြန်ကြားရေးတာဝန်ခံက “သင်တန်းမှာက အမိန့်နာခံမှုရှိအောင် control & command အကြောင်းတွေ၊ စစ်ရေးပြ၊ နိုင်ငံရေးအမြင်ကိုကျတော့ ကာကွယ်ရေးဘက်ကနေ လက်ချာပုံစံနဲ့ သင်ပေးတာပေါ့နော်၊ CDF-KKG က တပ်ရင်း ၇ ရင်းရှိတော့ သင်တန်းတွေကို တပ်ရင်းအလိုက်ဖွင့်လှစ်ကြပါတယ်။ ဗဟိုသင်တန်းအနေနဲ့ ဖွင့်လှစ်တာမျိုးလည်းရှိပါတယ်”လို့ ပြောပါတယ်။

CDF-KKG ရဲ့ အခြေခံစစ်ပညာသင်တန်းဆင်းပွဲမှာ စစ်ရေးပြအလှဆုံးဆု၊ လက်ဖြောင့်ဆုနဲ့ ဇွဲဆု စတဲ့ တဦးချင်း ထူးချွန်ဆုတွေကိုလည်း ပေးအပ်ခဲ့ပါတယ်။