မန္တလေး၊ ချမ်းအေးသာစံမြို့နယ်၊ မောရဂီဝါရပ်ကွက်၊ ၇၄ လမ်း၊ ၃၁- ၃၂ လမ်းကြာရှိ KBZ ဘဏ်ခွဲ ၄၆ ကို မတ် ၂၅ ရက် ဒီနေ့မနက် ၁၁ နာရီကျော်က အမျိုးသား သုံးဦးက ဓားပြတိုက်ခဲ့တာကြောင့် ကျပ် သိန်း ၂၀၀၀ ကျော်ပါသွားတယ်လို့ မြို့ခံတွေဆီက သိရပါတယ်။
ဒီနေ့မနက် ၁၁ နာရီကျော်က KBZ ဘဏ်ခွဲ ၄၆ ကို ဆိုင်ကယ်နှစ်စီးနဲ့ အမည်မသိအမျိုးသား သုံးဦး ရောက်လာပြီး သေနတ်နဲ့ ဓားပြကာ ဘဏ်ဝန်ထမ်းတွေကို ခြိမ်းခြောက်ပြီး ငွေတွေယူသွားတာလို့ ဝန်ထမ်းနဲ့ နီးစပ်သူက ပြောပါတယ်။
“သုံးယောက် ဝင်လာတာ ငွေထုတ်မယ့်ပုံစံနဲ့ အထဲရောက်တော့ ဝန်ထမ်းတွေကို သေနတ်နဲ့ ချိန်ထားတယ်။ တယောက်က ပုဆိန်နဲ့ တယောက်က ဓားပါတယ်။ ကောင်တာခုံပေါ်က ငွေတွေယူသွားတာ သိန်း ၂၀၀၀ ကျော်တယ်။”
KBZ ဘဏ်ခွဲကို ဓားပြတိုက် ငွေတွေယူထွက်ပြေးသွားပြီး နာရီဝက်လောက်ကြာမှ စစ်တပ်၊ ရဲနဲ့ ထောက်လှမ်းရေးတွေ ရောက်လာကာ ဘဏ်ဝန်ထမ်းတွေကို စစ်ဆေးနေတယ်လို့ မြို့ခံတဦးက ပြောပါတယ်။
“ဓားပြတိုက်တဲ့သူ လွတ်ရာကျွတ်ရာရောက်မှ ရဲတွေ၊ စစ်သားတွေ ရောက်လာပြီး CCTV ကို စစ်တာ။ ဝန်ထမ်းတွေရော အဲလိုစစ်ဆေးပြီးမှ လုသွားတဲ့သူတွေနောက် လိုက်တာ။ တယောက်မှ မမိဘူး။”
ချမ်းအေးသာစံမြို့နယ် KBZ ဘဏ်ခွဲ ၄၆ ဓားပြတိုက်မှုမှာ ငွေသား ၂၀၈၀ ပါသွားပြီး ပြစ်မှုကျူးလွန်သူတွေကို ဖမ်းမမိဘူးလို့ တိုင်းရဲတပ်ဖွဲ့နဲ့ နီးစပ်သူတွေဆီက သိရပါတယ်။
၂၀၂၂ ခုနှစ် ဇွန်နဲ့ ဇူလိုင်လအတွင်းကလည်း ချမ်းအေးသာစံနဲ့ ပြည်ကြီးတံခွန်က KBZ ဘဏ်ခွဲနှစ်ခု ဓားပြတိုက်ခံခဲ့ရပါတယ်။
