ကရင်ပြည်နယ်၊ မြဝတီမြို့နယ်၊ သင်္ကန်းညီနောင်မှာ စစ်ကောင်စီတပ်နဲ့ ကရင်လွတ်မြောက်ရေးတပ်မတော် (KNLA) တပ်တွေတိုက်ပွဲတွေ ဆက်လက်ဖြစ်ပွားနေပြီး အလယ်ဘိုတဲ စခန်းကုန်းက စစ်ကောင်စီတပ်ဖွဲ့ဝင်တွေ စခန်းစွန့်ခွာထွက်ပြေးသွားတယ်လို့ KNLA အရာရှိတဦးက ဒီဗွီဘီကို ပြောပါတယ်။

ကေအန်ယူ တပ်မဟာ ၆ စစ်ဗျူဟာမှူး ဗိုလ်မှူးကြီး စောနယ်ဒါးထူးက  “မြဝတီ - ​ကော့ကရိတ် လမ်း​ဟောင်း အလယ်ဘိုတဲစခန်းကုန်းမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေ တိုက်ပွဲဖြစ်ပွားတာ မရှိဘဲ စခန်းစွန့်ခွာထွက်ပြေးသွားတယ်။ မ​တ်လ ၁ဝ ရက်နေ့က တက်ပြီး ရှင်းလင်း​ရေးလုပ်လိုက်တယ်”လို့ ပြောပါတယ်။

သင်္ကန်းညီနောင် (ကွင်းကလေး)အခြေစိုက် ခမရ ၃၅၅ နဲ့ ခမရ ၃၅၆ တပ်ရင်းတွေကို မတ်လ ၇ ရက် မွန်းလွဲ ၁၂ နာရီလောက်ကစတင်ပြီး KNLA၊ PDF ပူးပေါင်းစစ်ကြောင်းတွေက ဝင်ရောက်တိုက်ခိုက်ခဲ့ရာ မတ်လ ၁၁ ရက် အထိ တိုက်ပွဲတွေ ဖြစ်ပွားနေပါတယ်။

သင်္ကန်းညီနောင် တိုက်ပွဲတွေကြောင့် မြန်မာ-ထိုင်းနယ်စပ် သောင်းရင်းမြစ်ကမ်းတလျှောက်မှာ ထိုင်းတပ်မတော်က ပင်မအင်အားအပြင် အရန်အင်အားတွေပါအသုံးပြုပြီး လုံခြုံရေး တိုးမြှင့်ထားတယ်လို့ မြန်မာပြည်သားများအရေးပူးတွဲလှုပ်ရှားမှုကော်မတီ ဥက္ကဋ္ဌ ဦးမိုးကြိုးက ပြောပါတယ်။

မတ် ၈ ရက်က စစ်ကောင်စီတပ်ရဲ့ လက်နက်ကြီးအပြင် လေကြောင်းကနေ ဗုံးကြဲတိုက်ခိုက် တာကြောင့် ပြည်သူ ၃ ယောက်သေဆုံးပြီး ၁၅ ယောက် ဒဏ်ရာရရှိခဲ့တဲ့အပြင် နေအိမ် ၄၀ ကျော် မီးလောင် ပျက်စီးခဲ့ပါတယ်။ 

စစ်ကောင်စီတပ်က လေကြောင်းကနေ တိုက်လေယာဉ်နဲ့ သဘာဝရိပ်သာ ဘိုးဘွားဆောင်ကို  ဗုံး ၃ လုံးကြဲချ တိုက်ခိုက်တာကြောင့်  သေဆုံးထိခိုက်သူတွေရှိခဲ့တပြီး  ဘိုးဘွား အယောက် ၁၅၀ ဟာ စိတ်ပိုင်းဆိုင်ရာ စိုးရိမ်ကြောက်လန့်နေကြတယ်လို့ ကူညီစောင့်ရှောက်ပေးနေသူ ကိုအောင်သူလင်းက ပြောပါတယ်။

စစ်ကောင်စီတပ်ရဲ့ လက်နက်ကြီးနဲ့ပစ်ခတ်မှု၊ လေကြောင်းတိုက်ခိုက်မှုတွေကြောင့် သင်္ကန်းညီနောင်၊ မဲကနယ်၊ မြစန္ဒီနဲ့အနီးအနားကျေးရွာက သောင်းနဲ့ချီတဲ့ ဒေသခံပြည်သူတွေဟာ နီးစပ်ရာဆွေမျိုးတွေနဲ့  မြန်မာ-ထိုင်းနယ်စပ် သောင်းရင်းမြစ်ကမ်းတလျှောက်မှာ ထွက်ပြေး ခိုလှုံနေရပါတယ်။ 

အောင်ခန့်