မွန်ပြည်နယ်၊ ကျိုက်ထိုမြို့မှာရှိတဲ့ ဆံတော်ရှင် ကျိုက်ထီးရိုးစေတီကို ဇန်နဝါရီ ၂၀ နဲ့ ၂၁ ရက် ပိတ်ရက်အတွင်း ဘုရားဖူး ၃ သောင်းခွဲကျော် ဝင်ရောက်ခဲ့တာကြောင့် ဒေသခံတွေ အဆင်ပြေကြတယ်လို့ ဂေါပကနဲ့ နီးစပ်သူတွေက ပြောပါတယ်။
စနေ၊ တနင်္ဂနွေ အလုပ်ပိတ်ရက်ဖြစ်တဲ့ ဇန်နဝါရီ ၂၀ နဲ့ ၂၁ ရက်နေ့မှာ ပြည်တွင်း ပြည်ပမှ ဘုရားဖူး ၃ သောင်းခွဲကျော် ဝင်လာတဲ့အတွက် ပုံမှန်နှုန်းနဲ့ ဘုရားဖူးဝင်ရောက်နေပြီလို့ ဂေါပကအဖွဲ့ဝင်တဦးက ပြောပါတယ်။
“ဒီပိတ်ရက်မှာ ဘုရားဖူးက မထင်ထားလောက်အောင် ဝင်ပါတယ်။ အရင် ကိုဗစ်ကာလ မတိုင်ခင်ကပုံစံမျိုး ဘုရားဖူးက ဝင်ရောက်နေပါပြီ။ အခု ဘုရားဖူးက ထမင်းဆိုင်တန်းတွေကော ရင်ပြင်တော်တွေကော ပြည့်နေတာပဲ။ ဘုရားဖူးဝင်တာများတော့ ဒေသခံတွေအတွက်လည်း အဆင်ပြေတာပေါ့။ အခုနှစ်ရက်အတွင်း ၃ သောင်းခွဲကျော် ဝင်တယ်ဆိုတာ တောင်တက်ကားစာရင်းအရပဲ။ ကုန်းကြောင်းတက်တဲ့သူတွေလည်း ရှိတာဆိုတော့ ဒီထက်ပိုများနိုင်ပါတယ်။ မနှစ်က တနှစ်လုံးဆို ဘရားဖူးက ၃ သိန်းလောက်ပဲ ဝင်ခဲ့တာ။ ဒီနှစ်တော့ ကျနော်တို့က ၁၀ သိန်းနီးပါးအထိ ဝင်ဖို့တော့ ခန့်မှန်းထားတယ်။”
ကျိုက်ထီးရိုးစေတီကို ဘုရားဖူးဝင်ရောက်မှုများတာကြောင့် တောင်ပေါ်မှာရှိတဲ့ အထမ်းသမား၊ ဈေးဆိုင်၊ ထမင်းဆိုင်၊ စားသောက်ဆိုင်နဲ့ တည်းခိုခန်းတွေ အဆင်ပြန်ပြေလာကြတယ်လို့ ထမင်းဆိုင်ဖွင့်နေသူတဦးက ပြောပါတယ်။
“ဒီလိုပြန်မရောင်းကောင်းတာ ၄ နှစ်လောက်ရှိပြီ။ ဘုရားဖူးက ဆက်တိုက်ဝင်နေလို့ တချက်မှတောင် မနားရပါဘူး။ ထမင်းဆိုင်တခုတည်း ရောင်းကောင်းတာမဟုတ်ဘူး၊ တခြားဈေးဆိုင်တွေလည်း တော်တော်ရောင်းကောင်းတာ။ ဈေးလေးရောင်းရတော့ တင်နေတဲ့အကြွေးလေးတွေ ပြန်ဆပ်ရတာပေါ့။ အရင် ၃၊ ၄ နှစ်က ဈေးဦးတောင် မပေါက်ခဲ့တဲ့နေ့တွေ ရှိပါတယ်။”
ကျိုက်ထီးရိုးတောင်ပေါ်မှာရှိတဲ့ တည်းခိုခန်းနဲ့ ဟိုတယ်တွေမှာလည်း နောက်တပတ်အတွက်ပါ အခန်းတွေ ဘိုကင်ပြည့်နေတာကြောင့် ကျိုက်ထီးရိုးဘုရားသွားဖို့ ရက်ရွှေ့လိုက်ရတယ်လို့ မော်လမြိုင်ဒေသခံတဦးက ပြောပါတယ်။
၂၀၂၃ ခုနှစ်မှာ ဆံတော်ရှင် ကျိုက်ထီးရိုးစေတီတော်ကို ပြည်တွင်းဘုရားဖူး ၂၈၄,၀၇၉ ဦးနဲ့ ပြည်ပဘုရားဖူး ၁၀,၂၁၄ ဦး စုစုပေါင်း ၂၉၄,၂၉၃ ဦး လာရောက်ခဲ့ပါတယ်။
