ချင်းပြည်နယ်၊ တီးတိန်မြို့နယ်၊ သိုင်းငင်းရွာ စစ်ကောင်စီဂိတ်စခန်းကို ဒေသခံ ကာကွယ်ရေး ပူးပေါင်းတပ်ဘက်က ဇန်နဝါရီ ၁၆ ရက် ဒီနေ့မနက်ပိုင်းမှာ တိုက်ခိုက်သိမ်းပိုက်နိုင်ခဲ့တယ်လို့ တော်လှန်ရေးအင်အားစုတွေက ပြောပါတယ်။

အဆိုပါ စခန်းသိမ်းတိုက်ပွဲအတွင်းမှာ စစ်ကောင်စီက လေကြောင်းပစ်ကူတွေ အသုံးပြုခဲ့ပြီး နှစ်ဖက်ထိခိုက်ကျဆုံးမှုတွေလည်း ရှိထားကာ ဒေသခံကာကွယ်ရေးတပ်ဘက်က လက်နက်ခဲယမ်းတွေလည်း သိမ်းဆည်းရမိထားတယ်လို့ ဆိုပါတယ်။

သိုင်းငင်း စစ်ကောင်စီစခန်းကို ဒီမနက်မှာပဲ သိမ်းနိုင်ပြီဖြစ်ကြောင်း CDF-CDM-SIYIN အဖွဲ့ တာဝန်ခံတဦးက  ဒီဗွီဘီကို အတည်ပြုပြောသလို CDF-CDM-Siyin ရဲ့ လူမှုကွန်ရက်စာမျက်နှာမှာလည်း  ရေးသားထားပါတယ်။

အဲ့ဒီသိုင်းငင်းစခန်းကို ချင်းဒေသကာကွယ်ရေးပူးပေါင်းတပ်ဘက်က ဇန်နဝါရီ ၁၂ ရက် ညနေပိုင်းကစတင်ပြီး ဝင်ရောက်စီးနင်း တိုက်ခိုက်ခဲ့ရာ တိုက်ပွဲ ၅ ရက်‌မြောက်နေ့မှာ စခန်းကို သိမ်းနိုင်ခဲ့တာပါ။

အဆိုပါ သိုင်းငင်းစစ်ကောင်စီစခန်း သိမ်းပိုက်ခံရမှုနဲ့ပတ်သက်ပြီး စစ်ကောင်စီဘက်ကတော့ ထုတ်ပြန်ထားတာ မရှိသေးသလို စစ်ကောင်စီကတော့ သိုင်းငင်းစခန်း မကျဖို့ရာ ကလေးမြို့ဘက်ကနေ လက်နက်ကြီးတွေနဲ့ အကြိမ်ကြိမ် ပစ်ကူပေးခဲ့ပါတယ်။

သိုင်းငင်းကျေးရွာဟာ ချင်းပြည်နယ်တောင်ပိုင်းနဲ့ မြောက်ပိုင်းကို ဆက်သွယ်ထားတဲ့ ကလေး-တီးတန်-ဖလမ်း လမ်းမပေါ်မှာ တည်ရှိပြီး ‌လူဦးရေ ၇၀၀ ကျော်နေထိုင်ကာ လက်ရှိမှာတော့ ဒေသခံတွေက ကျေးရွာတွင်းကနေ တိမ်းရှောင်နေတာ ၂ လဝန်းကျင်ရှိပြီလို့ CDF-SIYIN အဖွဲ့ တာဝန်ခံက ပြောပါတယ်။

နိုဝင်ဘာ ၂၇ ရက်က စတင်ပြီး ကလေး-သိုင်းငင်း၊ တီးတိန်လမ်းမကြီးကို ဒေသခံတွေ အနေနဲ့ရော ခရီးသွားတွေအနေနဲ့ပါ အသုံးမပြုကြဖို့ CDF-Civic Defense Militia -CDM-Siyin အဖွဲ့က သတိပေးထားတာပါ။

နိုဝင်ဘာ ၂၉ ရက်ကလည်း ရေဇွာမြို့က စစ်ကောင်စီစခန်းအားလုံးကို ချင်း‌ဒေသ ကာကွယ်ရေးပူးပေါင်းတပ်ဘက်က သိမ်းပိုက်နိုင်ခဲ့ပါသေးတယ်။

လက်ရှိ ချင်းပြည်နယ်မှာတော့ ချင်းဒေသခံ ကာကွယ်ရေးပူးပေါင်းတပ်ဘက်က ရိခေါ်ဒါရ်မြို့၊ ရေဇွာမြို့၊ ဆူရ်ခွား၊ နှာရိန်၊ လိုင်လင်းပီ၊ မကွီအိမ်နူး၊ ဝေဘူလ စတဲ့မြို့ ၇ မြို့ကို သိမ်းပိုက်ထားနိုင်ပြီး ဖြစ်တယ်လို့ ချင်းဒေသကာကွယ်ရေးအဖွဲ့တွေထံက သိရပါတယ်။