တနင်္သာရီတိုင်း၊ ပြည်သူ့ကာကွယ်ရေးတပ်မတော် (PDF)၊ မြိတ်ခရိုင်၊ အမှတ် ၁ တပ်ရင်းမှာ ဒု-တပ်ရင်းမှူးက လုပ်ပိုင်ခွင့်ထက်ကျော်လွန်ကာ တပ်သား ၂ ဦးကို အပြစ်ပေးခဲ့တဲ့အပေါ် MODရဲ့ တိုင်ကြားရေးကော်မတီက အမြန်ဆုံးအရေးယူ ဆောင်ရွက်နေတယ်လို့ မြိတ်ခရိုင်၊ အမှတ် ၁ တပ်ရင်း တာဝန်ခံက ပြောပါတယ်။
မြိတ်ခရိုင်၊ အမှတ် ၁ တပ်ရင်း တာဝန်ခံ ကိုအဲလစ်က “အခုကိစ္စမှာ ဒု-တပ်ရင်းမှူး ကိုယ်တိုင်ပါဝင်နေတဲ့အတွက် ကျနော်တို့က အမှုတွဲတည်ဆောက်ပြီးတော့ MOD ကို တင်ပေးရတယ်။ အဲဒီအမှုတွဲနဲ့ပတ်သက်ပြီး ကာကွယ်ရေးဝန်ကြီးဌာနက စုံစမ်းစစ်ဆေးမှုတွေ လုပ်နေတယ်။ ကျနော်တို့ဆီ ချိတ်ဆက်ပြီး မေးမြန်းလာတာတွေလည်းရှိပါတယ်။ အဲဒီအမှုတွဲနဲ့ ပတ်သက်ပြီးတော့ အပြစ်ရှိသူကို အရေးယူနိုင်ဖို့ MOD ရဲ့ တိုင်ကြားရေးကော်မတီက စုံစမ်းစစ်ဆေးမှုတွေ လုပ်ဆောင်နေတယ်”လို့ ပြောပါတယ်။
၂၀၂၃၊ ဒီဇင်ဘာ ၂၃ ရက်မှာ ဒု-တပ်ရင်းမှူး Tiger (မင်းသား) က မွမ်းမံသင်တန်းမတက်ရောက်တဲ့ တပ်သားရောင်နီကို လုပ်ထုံးလုပ်နည်းအရမဟုတ်ဘဲ ခေါင်းကို သေနတ်ဒင်နဲ့ ရိုက်ပြီး သေနတ်နဲ့ ချိန်ရွယ်အပြစ်ပေးခဲ့ပါတယ်။
ဒါ့အပြင် အဆိုပါကိစ္စကို လာရောက်ညှိနှိုင်းသူ ဒု-ဘဏ္ဍာရေးမှူး ကိုစံမျိုးအောင်ကိုလည်း ပါးရိုက်ခဲ့သေးတယ်လို့ တပ်ရင်းက ရဲဘော်တဦး ပြောပါတယ်။
“ဥပဒေအထက်မှာ ဘယ်သူမှမရှိစေဘဲနဲ့ ဒီကိစ္စအပေါ်မှာ အပြစ်ရှိသူကို ထိထိရောက်ရောက် အမြန်ဆုံး အရေးယူစေချင်တယ်။”
ဒီဖြစ်စဉ်နဲ့ပတ်သက်ပြီး ဒီဗွီဘီက မြိတ်ခရိုင်၊ အမှတ် (၁) ဒုတပ်ရင်းမှူးကို ဆက်သွယ်မေးမြန်းခဲ့ရာ ပြန်လည် ဖြေကြားခြင်းမရှိပါဘူး။
၂၀၂၃၊ ဒီဇင်ဘာ ၃၀ ရက်မှာ အခြေခံပညာရေး ဘုတ်အဖွဲ့များကော်မတီက ဒု-တပ်ရင်းမှူးရဲ့ လုပ်ရပ်ကို ကန့်ကွက်ရှုတ်ချထားပြီး MOD အနေနဲ့ ထိရောက်စွာ အရေးယူပေးဖို့ သဘောထား ထုတ်ပြန်ထားပါတယ်။
အခြေခံပညာရေးဘုတ်အဖွဲ့များကော်မတီမှ ဆရာတဦးက “MOD အနေနဲ့လည်း အရေးယူဆောင်ရွက်နေတယ်လို့ သိရတယ်။ MOD က ချမှတ်ထားတဲ့ ရဲဘော်တွေ လိုက်နာရမယ့် နည်းဥပဒေအတိုင်း ကျူးလွန်ခဲ့တဲ့သူကို ထိထိရောက်ရောက် အရေးယူစေချင်တယ်။ ပြည်သူတွေသိအောင်လည်း ပွင့်လင်းမြင်သာမှု ရှိစေချင်တယ်” လို့ ပြောပါတယ်။
အဆိုပါကိစ္စအပေါ် တရားမျှတမှုရှိတဲ့အထိ မဖြေရှင်းပေးပါက ပုလော PDF အဖွဲ့ကို ထောက်ပံ့မှုတွေ ရပ်တန့်ထားမယ်လို့ ပြည်ပရောက်ထောက်ပို့အဖွဲ့ ၁၂ ဖွဲ့က ဇန်နဝါရီ ၉ ရက်နေ့မှာ သဘောထား ထုတ်ပြန်ထားပါတယ်။
