ဂျာမနီနဲ့ ဘိုင်ယန်မြူးနစ် ဂန္ထဝင်ကစားသမားကြီး ဖရန့်ဇ်ဘက်ကင်ဘောင်ဝါဟာ အသက် ၇၈ နှစ်အရွယ်မှာ ကွယ်လွန်သွားခဲ့ပါတယ်။
ဘလွန်းဒီအော ကမ္ဘာ့အကောင်းဆုံးကစားသမားဆုကို ၂ ကြိမ် ရရှိခဲ့ဖူးသူ နောက်တန်းကစားသမားကြီးဟာ ပြီးခဲ့တဲ့တနင်္ဂနွေနေ့က နေအိမ်မှာ ငြိမ်းချမ်းစွာနဲ့ ကွယ်လွန်ခဲ့ကြောင်း၊ မိသားစုဝင်တွေအနေနဲ့ ဝမ်းနည်းကြေကွဲရကြောင်း ဂျာမနီသတင်းအေဂျင်စီတခုကို မိသားစုဝင်တဦးက ပြောပါတယ်။
ဘက်ကင်ဘောင်ဝါဟာ ကစားသမားဘဝက အနောက်ဂျာမနီအသင်းနဲ့အတူ ၁၉၇၄ ကမ္ဘာ့ဖလား ရယူနိုင်ခဲ့သလို ဂျာမနီနည်းပြဘဝမှာလည်း ၁၉၉၀ ကမ္ဘာ့ဖလားကို ရယူနိုင်ခဲ့သူပါ။
ဘိုင်ယန်မြူးနစ်အသင်းမှာ စုစုပေါင်း ပွဲပေါင်း ၆၀၀ နီးပါး ကစားခဲ့ပြီး နိုင်ငံအသင်းအတွက် စုစုပေါင်း ၁၀၃ ပွဲ ကစားခဲ့ပါတယ်။
ဘက်ကင်ဘောင်ဝါဟာ ဂျာမနီဘောလုံးလောကရဲ့ အကောင်းဆုံးကစားသမားဖြစ်ပြီး လစ်ဘရို နောက်ခံလူနေရာရဲ့ အခန်းကဏ္ဍကို ပြောင်းလဲပေးနိုင်ခဲ့သူဖြစ်ကြောင်း ဂျာမနီလက်ရွေးစင်နည်းပြ နာဂယ်စ်မန်းက ပြောပါတယ်။
Photo-Reuters
