ဘင်္ဂလားဒေ့ရှ်နိုင်ငံမှာ ဇန်နဝါရီ ၇ ရက် မနက်က ရိုဟင်ဂျာ ဒုက္ခသည်စခန်းတခု မီးရှို့ခံရပြီး အိမ်ခြေ ၁၀၀၀ ကျော် မီးလောင်ကျွမ်းခဲ့တယ်လို့ ရိုဟင်ဂျာဒုက္ခသည်တွေဆီကနေ သိရပါတယ်။
မီးရှို့တာကတော့ ဘယ်အဖွဲ့စည်းရဲ့ လက်ချက်လဲဆိုတာကို အတည်မပြုနိုင်သေးဘဲ ဘင်္ဂလားဒေ့ရှ် မီးသတ်ဌာနနဲ့ ရိုဟင်ဂျာပြည်သူတွေ ဝိုင်းဝန်းမီးငြိမ်းသတ်ခဲ့လို့ မနက် ၄ နာရီအချိန်မှသာ မီးထိန်းနိုင်ခဲ့တယ်လို့ ဆိုပါတယ်။
အဲဒီမီးလောင်မှုကြောင့် ဗလီကျောင်း ၁၀ လုံး အပါအဝင် အိမ်ခြေ ၁၀၀၀ လောက် မီးလောင်ကျွမ်းခဲ့ပြီး မီးကူးစက်မှုမရှိအောင် အိမ်ခြေ ၃၀၀ ကျော် ဖြိုဖျက်ခဲ့ရကာ ဒဏ်ရာအနည်းငယ်ရရှိသူတချို့ရှိပေမယ့် သေဆုံးသူတော့ မရှိဘူးလို့ ပြောပါတယ်။
“မီးဘေးသင့်ပြည်သူတွေကိုတော့ လက်ရှိအချိန်မှာ သက်ဆိုင်ရာ NGO/INGO အဖွဲ့တွေက ကူညီထောက်ပံ့တာတွေတော့ ပြုလုပ်ပေးနေတယ်။ ဒါပေမယ့် ဆောင်းဥတုဖြစ်တာကြောင့် အနွေးထည်၊ စောင်၊ အဝတ်အထည်တွေ၊ အမိုးအကာတွေနဲ့ စားနပ်ရိက္ခာတွေ အရေးပေါ်အကူအညီ လိုအပ်နေတယ်” လို့ ကိုဆွေယောဒုလ်ကရိမ်က ပြောပါတယ်။
ဘင်္ဂလားဒေ့ရှ်နိုင်ငံမှာ ဒီဇင်ဘာ ၃၁ ရက် မနက်ကလည်း ရိုဟင်ဂျာဒုက္ခသည်စခန်းတခု မီးရှို့ခံရပြီး အမျိုးသမီး ၁ ယောက်သေဆုံးကာ၊ ၃ ယောက်ဒဏ်ရာရရှိခဲ့ပြီး နေအိမ် ၂၄ လုံး မီးလောင်ကျွမ်းခဲ့တယ်လို့ ရိုဟင်ဂျာဒုက္ခသည်တွေဆီကနေ သိရပါတယ်။
