ရခိုင်ပြည်နယ်၊ ပေါက်တောမြို့နယ်နဲ့ စစ်ကိုင်းတိုင်း၊ တန့်ဆည်မြို့နယ်မှာ စစ်ကောင်စီက လေကြောင်းနဲ့ တိုက်ခိုက်ပြီး လက်နက်ကြီနဲ့ပစ်လို့ မူကြိုကျောင်းသားအပါအဝင် ပြည်သူ ၆ ယောက် သေဆုံးပြီး ၁၄ ယောက် ဒဏ်ရာရသွားပါတယ်။
ပေါက်တောမြို့နယ်၊ တောင်းဖူးကျေးရွာကို ဇန်နဝါရီ ၅ ရက်နေ့ ညနေ ၅ နာရီခွဲလောက်မှာ စစ်တွေအခြေစိုက် ရဲတပ်ရင်း ၁၂ က လက်နက်ကြီး ၁၀ လုံး ထက်မနည်း ပစ်ခတ်ခဲ့တယ်လို့ တောင်းဖူးကျေးရွာ ဒေသခံတယောက်က ပြောပါတယ်။
လက်နက်ကြီးကျည်ဟာ ရွာထဲမှာ ၁ လုံးကျရောက်ပေါက်ကွဲခဲ့လို့ ပြည်သူ ၂ ယောက် အပြင်းအထန်ဒဏ်ရာရရှိခဲ့ပြီး ရွာအနီးနားတွေမှာလည်း ကျရောက်ပေါက်ကွဲခဲ့တယ်လို့ ဆိုပါတယ်။
အဲဒီလက်နက်ကြီးကျည်ကြောင့် တောင်းဖူးကျေးရွာက အသက် ၃၀ အရွယ် ဒေါ်ဦးဝင်းသာရဲ့ ညာဘက်ဒူးနဲ့ အသက် ၄၆ နှစ်အရွယ် ဒေါ်ဦးအေးသန်းရဲ့ ညာဘက်လက်မောင်းနဲ့ ဒူးဆစ်တို့မှာ အပြင်းအထန်ဒဏ်ရာရရှိခဲ့တယ်လို့ ဒေသခံတွေက ပြောပြီး သူတို့ကို နီးစပ်ရာ ဆေးရုံတခုကို ပို့ဆောင်ပြီး ဆေးဝါးကုသမှုတွေ ပြုလုပ်ပေးထားတယ်လို့ ဆိုပါတယ်။
ပေါက်တောမြို့ဘက်မှာတော့ ညနေ ၄ နာရီကျော်လောက်က ရက္ခိုင့်တပ်တော် အေအေနဲ့ စစ်ကောင်စီတပ်တို့ အပြန်အလှန် တိုက်ပွဲဖြစ်သံကြားပြီး စစ်ကောင်စီဘက်က နေဗီ အမှတ် ၄၄၃ နဲ့ စစ်တွေအခြေစိုက် ရဲတပ်ရင်း ၁၂ က လက်နက်ကြီးတွေနဲ့ ပစ်ကူပေးခဲ့ကြတယ်လို့ ဒေသခံတွေက ပြောပါတယ်။
ရခိုင်ပြည်နယ်မှာ နိုဝင်ဘာ ၁၃ ရက်နေ့ မနက်ပိုင်းက တကျော့ပြန်တိုက်ပွဲတွေ ပြန်လည် စတင်ပြီးနောက်ပိုင်း စစ်ကောင်စီတပ်တွေက လက်နက်ကြီး လက်နက်ငယ်တွေနဲ့ နေ့ရော ညပါ ပစ်ခတ်ခဲ့လို့ ဒေသခံပြည်သူ ၆၀ လောက်သေဆုံးပြီး ၁၃၀ ကျော်လောက် ဒဏ်ရာရရှိခဲ့တယ်လို့ ဒေသခံတွေဆီကနေ သိရပါတယ်။
စစ်ကိုင်းတိုင်း၊ တန့်ဆည်မြို့နယ်၊ စိန်နန်းရွာကို ဇန်နဝါရီ ၄ ရက် မွန်းလွဲ ၂ နာရီကျော်လောက်က မန္တလေး၊ တံတားဦးက တက်လာတဲ့ တိုက်လေယာဉ်တစင်းနဲ့ ဗုံးကြဲတိုက်ခိုက်ခဲ့လို့ အသက် ၅ နှစ်အရွယ် မူကြိုကျောင်းသားတယောက်အပါအဝင် ပြည်သူ ၆ ယောက် သေဆုံးခဲ့ပါတယ်။
ဒေသခံပြည်သူ ၁၂ ယောက် ဒဏ်ရာရပြီး ၂ ယောက်ကတော့ စိုးရိမ်ရတယ်လို့ ဒေသခံတွေက ပြောပါတယ်။
ပြီးတော့ ပြည်သူနေအိမ် ၄ လုံး လုံးဝ ပျက်စီးခဲ့ပြီး ၄ လုံး ကတော့ နည်းနည်းပဲ ပျက်စီးသွားသလို့ စာသင်ကျောင်း ဘော်ဒါဆောင် ၂ ဆောင်လည်း ပျက်စီးသွားတယ်လို့ ဆိုပါတယ်။ နွား ၂ ကောင်၊ ဝက် ၈ ကောင်လည်း သေဆုံးခဲ့ပါတယ်။
အကြောင်းမဲ့ လာရောက်တိုက်ခိုက်တာဖြစ်ပြီး 46Q GL 07951 70868 ပေါင် ၂၀၀ ဗုံး ၁ လုံး၊ 46Q GL 07997 70836 ရှော့ကဒ် ၂ လုံးနဲ့ 46Q GL 08034 70826 ရှော့ကဒ် ၁ လုံး ပစ်ချခဲ့တာလို့ ဒေသကာကွယ်ရေး အဖွဲ့တွေဆီက သိရပါတယ်။
