စက်သုံးဆီစျေးတက်လို့ဆိုပြီး အဝေးပြေးရထားလက်မှတ်ခတွေကို ဇန်နဝါရီ ၁ ရက်ကစပြီး စျေးနှုန်း တိုးမြှင့်ရောင်းချသွားဖို့ရှိကြောင်း စစ်ကောင်စီ လက်အောက်ရှိ မြန်မာ့မီးရထားဌာနဆီက သိရပါတယ်။
အဝေးပြေးရထား လက်မှတ်ခတွေကို ခရီးစဥ်အလိုက် ပြင်ဆင်သတ်မှတ်ထားပြီး သက်ဆိုင်ရာ ဘူတာတွေမှာလည်း အသိပေးထားတယ်လို့ ဆိုပါတယ်။
မြန်မာ့မီးရထားသွား/လာရေးဌာနမှ Non CDM တဦးက "မနက်ဖြန်ကစပြီးစျေးတက်မှာ။ ကြိုတင်မှတ်ဝယ်သူတွေကိုလည်း ပြောင်းလဲကောက်ခံမယ့်နှုန်းနဲ့ ရောင်းပေးနေတယ်" လို့ ပြောပါတယ်။
ရန်ကုန်-မော်လမြိုင်လမ်းပိုင်းမှာဆိုရင် အထူးတန်းခရီးစဥ်အစ/အဆုံးအတွက် အရင်ကထက် ၃၀၀၀ ကျပ်၊ ရိုးရိုးတန်းခရီးစဥ် အစအဆုံးအတွက် ၂၀၀၀ ကျပ် တိုးမြှင့်သွားမယ်လို့ မော်လမြိုင်ဘူတာမှာ ကြေညာထားပါတယ်။
ဒါ့အပြင် တခြားလမ်းပိုင်းတွေနဲ့ ဘူတာခရီးစဥ် အကွာအဝေးလိုက် စျေးတွေ ပြောင်းထားတယ်လို့လည်း ခရီးသည်တွေဆီက သိရပါတယ်။
စစ်ကောင်စီရဲ့ မြန်မာ့မီးရထားဌာနဟာ ပြီးခဲ့တဲ့နှစ် ဇူလိုင်လကလည်း တွက်ခြေမကိုက်လို့ဆိုပြီး မူလရထားလက်မှတ်ခရဲ့ ၅၀ ရာခိုင်နှုန်း တိုးမြှင့်ခဲ့ပါသေးတယ်။
"ရထားဆိုတာက အရှုံးခံပြေးဆွဲရတာ၊ စစ်ကောင်စီအနေနဲ့က အရှုံးကို တာရှည်မခံနိုင်လို့ စျေးဆက်တိုက်တိုးတောင်းနေရတာ။ အခုပြေးဆွဲနေတာလည်း ဟန်ပြလောက်ပဲရှိတာပါ။"
လက်ရှိမှာ ရန်ကုန်မြို့ကို အခြေပြုပြီး မော်လမြိုင်၊ မန္တလေး၊ ပြည်လမ်းပိုင်းရထားတွေ ပြေးဆွဲနေတာရှိပြီး တရားဝင်လက်မှတ်နှုန်းထက် ပိုကာ မှောင်ခိုစျေးနဲ့ ဝယ်ယူနေကြရတာတွေရှိနေတယ်လို့ အဲဒီလုပ်ငန်းနဲ့နီးစပ်သူတွေဆီက သိရပါတယ်။
