ထိုင်းနိုင်ငံ၊ မဲဆောက်မြို့ကို နှစ်သစ်ကူးအတွက် သွားရောက်တဲ့သူ များပြားတဲ့အတွက် ကရင်ပြည်နယ်၊ မြဝတီမြို့၊ အမှတ်-၁ တံတားမှာ ပိတ်မိခဲ့တယ်လို့ ခရီးသွားတွေနဲ့ ယာဉ်မောင်းတွေဆီက သိရပါတယ်။ 

ဒီဇင်ဘာ ၃၁ ရက် မနက် ၁၀ နာရီအချိန်လောက်ကစပြီး ဖြတ်သန်းသွားလာခွင့်မရဘဲ အလည်အပတ် ဗီဇာရရှိဖို့အတွက် မြဝတီဘက်ခြမ်းတံတားထိပ်မှာ လူရာကျော် တန်းစီ စောင့်ဆိုင်းခဲ့ရပါတယ်။

မြဝတီ-မဲဆောက်ယာဉ်လိုင်း ကားမောင်းသမားတယောက်က “အလည်အပတ် ဗီဇာတုံးထုပေးတဲ့ အစိမ်းရောင်စာရွက် ကုန်နေတာ။ အခုလိုရက်မျိုးက နှစ်တိုင်း ခရီးသွားတဲ့သူများတယ်။ မြန်မာဘက်က လဝကတွေ ကြိုတင်စီစဉ်မထားလို့ဖြစ်တာ။ ခရီးသွားတွေ အဆင်မပြေတော့ ကားသမားတွေပါ ဒုက္ခရောက်တယ်။ ဒီနေ့အကုန်တောင် သွားလို့ရပါ့မလား မသိဘူး” လို့ ဒီဗွီဘီကို ပြောပါတယ်။ 

ဒီဇင်ဘာလ ရုံးပိတ်ရက်ကစလို့ အမှတ်-၁ တံတားကနေ မဲဆောက်မြို့ကို သွားရောက် လည်ပတ်ကြသူ အများအပြားရှိပြီး နှစ်သစ်ကူးနေ့ ၃၁ ရက်မှာတော့ တံတားပိတ်တဲ့ အခြေအနေထိ အများအပြား တန်းစီစောင့်ဆိုင်းခဲ့ရတယ်လို့ သိရပါတယ်။

ခရီးသွားပြည်သူတယောက်က “မနက်ကတည်းက တန်းစီနေတာ။ တိုးနေတဲ့သူတွေက အများကြီးပဲ။ နေ့လယ် ၃ နာရီကျော်မှ ဖြတ်ခွင့်ရတယ်။ တုံးထုပေးတဲ့စာရွက် ကုန်သွားတော့ ပိုကြာသွားတာ။ အလည်သွားရင်း အပြန်ဈေးဝယ်ရအောင် သွားတာပါ” လို့ ဒီဗွီဘီကို ပြောပါတယ်။ 

ခရီးသွားပြည်သူတွေ များပြားတဲ့နေ့မှာပဲ မြန်မာနိုင်ငံ လ.ဝ.က က နိုင်ငံကူးခွင့်လက်မှတ် ထုတ်ပေးတဲ့စာရွက်ကုန်နေတဲ့အတွက် နေ့လယ်ပိုင်းအချိန်ကျမှ ဖြတ်သန်းခွင့်ကို လုပ်ပေးနိုင်ခဲ့တယ်လို့ သိရပါတယ်။ 

အမှတ်-၁ တံတားဖြတ်သန်းခွင့်ကို ကိုဗစ်-၁၉ ရောဂါပိုးပြန့်ပွားချိန်ကနေ အခုထိ ၃ နှစ်ကြာ ပိတ်ထားခဲ့တာဖြစ်ပြီး အခု ၂၀၂၃ ဇန်နဝါရီ ၁၂ ရက်မှာမှ မနက် ၆ နာရီကနေ ညနေ ၆ နာရီအထိ ပြန်ဖြတ်သန်းခွင့်ပြုခဲ့ပါတယ်။

ထိုင်းနိုင်ငံ၊ မဲဆောက်မြို့ကို လာရောက်လည်ပတ်ကြသူတွေကို ၇ ရက်ကြာ နေခွင့် လက်မှတ်ထုတ်ပေးပြီး အိမ်ထောင်စုစာရင်းနဲ့ မှတ်ပုံတင်ပြကာ မြန်မာကျပ်ငွေ ၂,၀၀၀ နဲ့ ထိုင်းဘတ်ငွေ ၆၀ ပေးရတယ်လို့ သိရပါတယ်။ 

Photo - Cj