ပြင်သစ်သမ္မတ အီမန်နျူရယ် မက်ခရွန်က ဆီးရီးယားနိုင်ငံဆီ လာလည်ချိန် ဇူလိုင် ၇ ရက်က ဒမတ်စကတ်မြို့ကို လှုပ်ခတ်ခဲ့တဲ့ ပေါက်ကွဲမှုတွေကို ဆီးရီးယားအစိုးရက ချက်ချင်း စပြီး စုံစမ်းစစ်ဆေးလိုက်ပြီလို့ ပြည်ထဲရေးဝန်ကြီးဌာန ပြောရေးဆိုခွင့်ရှိသူက ပြောပါတယ်။

ပြောရေးဆိုခွင့်ရှိသူ  နူး အယ်လ်-ဒင် အယ်လ်-ဘာဘာက “မကြာသေးခင်ကမှ တာဝန်ရှိသူတွေကို ညွှန်ပြနေတဲ့ ကနဦး သဲလွန်စတခုကို ကျနော်တို့ ရှာတွေ့ခဲ့ပါတယ်” လို့ ထပ်ပြောပါတယ်။

ကနဦး တွေ့ရှိချက်တွေအရ ပေါက်ကွဲစေတတ်တဲ့ ပစ္စည်းတွေကို မပေါက်ကွဲမီ မိနစ်ပိုင်းအလိုမှာ လာထားခဲ့တယ်ဆိုတာ ပြသခဲ့ပြီး မက်ခရွန်ရဲ့ လုံခြုံရေးစည်းရိုးကို ချိုးဖောက်ဖို့ ရည်ရွယ်ခဲ့သလို ပစ်မှတ်ထားဖို့ ရည်ရွယ်ချက်ရှိတယ်လို့ ပေါက်ကွဲမှုဖြစ်တဲ့နေရာက သတင်းထောက်တွေနဲ့ စကားပြောဆိုရာမှာ အယ်လ်-ဘာဘာက ပြောပါတယ်။

မက်ခရွန် ညအိပ်ခဲ့တဲ့ ဒမတ်စကတ်မြို့က ဟိုတယ်တခုအနားမှာ ဇူလိုင် ၇ ရက်က ဗုံး ၂ လုံး ပေါက်ကွဲခဲ့လို့ လူ ၁၈ ယောက် ဒဏ်ရာရခဲ့တာပါ။

မက်ခရွန် တည်းခိုနေတဲ့ ဟိုတယ်အနားက ရပ်ကွက်မှာ ပေါက်ကွဲမှု ၂ ခု မဖြစ်မီ ဒမတ်စကတ်စ်မြို့က ဆီးရီးယား အရပ်ဘက် လူ့အဖွဲ့အစည်းဝင်တွေနဲ့ မက်ခရွန်တို့ တွေ့ဆုံနေတဲ့ ဗီဒီယိုကို ရိုက်တာသတင်းဌာနက ဗီဒီယိုရိုက်ကူးသူတယောက်က ရိုက်ကူးခဲ့ပါတယ်။

ဆီးရီးယားသမ္မတ ဘာရှား အယ်လ်-အာဆတ် ရာထူးကနေ ဖြုတ်ချခံရပြီးတဲ့ နောက်ပိုင်း ဥရောပသမဂ္ဂ ခေါင်းဆောင်တယောက်က ဆီးရီးယားကို ပထမဆုံး လာလည်ချိန်မှာ ဗုံးကွဲမှုက လွှမ်းမိုးခဲ့ပါတယ်။

ပေါက်ကွဲမှုတွေ မဖြစ်မီ ဟိုတယ်ကနေ မော်တော်ယာဉ်တန်းနဲ့ ထွက်သွားတဲ့ မက်ခရွန်က သမ္မတအိမ်တော်မှာ ဆီးရီးယားသမ္မတ အာမက် အယ်လ်-ရှာရာနဲ့ တွေ့ပြီး သူ့ခရီးစဉ်ကို ဆက်ခဲ့ပါတယ်။ ပေါက်ကွဲမှုတွေကို မကြားခဲ့ရဘူးလို့ ပြင်သစ်သမ္မတရဲ့ အီလီစီးနန်းတော်က ပြောပါတယ်။

၁၃ နှစ်ကြာ ပြည်တွင်းစစ်ကြောင့် ပျက်စီးနေတဲ့ ဆီးရီးယားနိုင်ငံကို တည်ငြိမ်အောင်နဲ့ ပြန်တည်ဆောက်နိုင်အောင် ကြိုးပမ်းနေချိန် အနောက်နိုင်ငံတွေနဲ့ နီးကပ်တဲ့ ဆက်ဆံရေးကို တည်ဆောက်ထားတဲ့ အယ်လ်ကိုင်းဒါး တပ်မှူးဟောင်း ရှာရာက ရင်ဆိုင်နေရတဲ့ လုံခြုံရေးဆိုင်ရာ စိန်ခေါ်မှုတွေကို ဒီတိုက်ခိုက်မှုက မီးမောင်းထိုးပြနေပါတယ်။

Source: Reuters