ဩစတြေးလျကလပ် မက်အာသာအသင်းနဲ့ AFC ဖလား ယှဉ်ပြိုင်ရမယ့် မြန်မာနေရှင်နယ်လိဂ်ကလပ် ရှမ်းယူနိုက်တက်အသင်းကို ဩစတြေးလျ ဖက်ဒရယ်အစိုးရက ပြည်ဝင်ခွင့်ဗီဇာ မပေးခဲ့ဘူးလို့ အာဆီယံဘောလုံးအဖွဲ့ချုပ်က နိုဝင်ဘာ ၂၇ ရက်မှာ ထုတ်ပြန်ပါတယ်။

ရှမ်းယူနိုက်တက်အသင်းဟာ AFC ဖလား အုပ်စုပွဲစဉ်အဖြစ် ဩစတြေးလျနိုင်ငံမှာ နိုဝင်ဘာ ၃၀ ရက်နေ့ မက်အာသာအသင်းနဲ့ ကစားဖို့ရှိပေမဲ့ ဩစတြေးလျဖက်ဒရယ်အစိုးရက ပြည်ဝင်ခွင့်ဗီဇာပေးဖို့ကို ငြင်းပယ်ခဲ့တာပါ။

မက်အာသာအသင်းဟာ ပွဲမဖြစ်မြောက်ပါက ကလပ်နဲ့ ဩစတြေးလျ ဘောလုံးအဖွဲ့ချုပ်တို့ကို အာရှ‌ဘောလုံးအဖွဲ့ချုပ်က အရေးယူမှာဖြစ်တဲ့အတွက် အဆိုပါပွဲကို ဩစတြေးလျနိုင်ငံအစား ထိုင်းနိုင်ငံ ဘန်ကောက်မြို့မှာရှိတဲ့ BG ပထုံအသင်းရဲ့ကွင်းမှာ ယှဉ်ပြိုင်သွားမှာ ဖြစ်ပါတယ်။

ဩစတြေးကလပ် မက်အာသာအသင်းနဲ့ ရှမ်းယူနိုက်တက်အသင်းတို့ဟာ အုပ်စု ပထမအကျော့အဖြစ် ရန်ကုန်မြို့ သုဝဏ္ဏကွင်းမှာ ယှဉ်ပြိုင်ကစားခဲ့ပြီး မက်အာသာအသင်းက ၃ ဂိုး ဂိုးမရှိနဲ့ ဂိုးပြတ်အနိုင်ရထားပါတယ်။

ရှမ်းယူနိုက်တက်အသင်းဟာ AFC ဖလား အုပ်စု စ မှာ ၄ ပွဲကစား ရမှတ် ၁ မှတ်သာ ရရှိထားပြီး ၂ ပွဲကစားဖို့ ကျန်ရှိနေပေမဲ့ အုပ်စုအဆင့်က ထွက်ခွာခဲ့ပြီး ဖြစ်ပါတယ်။