ထိုင်းဘက်ခြမ်းက ရဲအရာရှိတွေဟာ ကရင်ပြည်နယ် မြဝတီမြို့နယ် ရွှေကုက္ကိုလ် ဒေသထဲထိ ဝင်ရောက်ပြီး လိုင်းကြေးကောက်ခံနေတာကြောင့် ကရင်နယ်ခြားစောင့်တပ် BGF က မကျေနပ်ဘဲ နယ်ခြားဂိတ်တွေ ပိတ်မယ်လို့ ခြိမ်းခြောက်ခဲ့ကြောင်း One News ထိုင်းရုပ်သံသတင်းမှာ ဖော်ပြပါတယ်။
ဒီမတိုင်ခင်ကတော့ မဲဆောက်မြို့နယ် ဝမ်းကျောက်ကျေးရွာက နယ်စပ်ဂိတ်နဲ့ မယ်လမတ်မြို့နယ် ဝမ်းဖာကျေးရွာက နယ်စပ်ဂိတ် ၂ ခုကို ကရင် BGF ခေါင်းဆောင် ဗိုလ်မှူးကြီးစောချစ်သူအမိန့်နဲ့ နိုဝင်ဘာ ၄ ရက်ကစ ၃ လတာကာလထိ ထိုင်းဘက်ခြမ်းက နိုင်ငံခြားသားတွေ၊ အထူးသဖြင့် ထိုင်းနဲ့ တရုတ်ကို ဝင်ခွင့်မပြုတော့ဘူးလို့ သတင်းတွေ ထွက်ပေါ်ခဲ့ပါတယ်။
အခုလို ပိတ်ပင်ရတဲ့အကြောင်းရင်းမှာ ထိုင်းရဲတွေက ရွှေကုက္ကိုလ်ဒေသမှာ တရုတ် အပါအဝင် တခြားနိုင်ငံခြားသားတွေ သွားရောက်ပြီး ကာစီနိုလောင်းကစားတာ၊ ကေတီဗွီရုံ သွားတာတွေရှိတာကြောင့် ပြဿနာမဖြစ်ချင်ရင် ၁ ဦးကို ဘတ် ၁၀၀၀ မှ ၁၅၀၀ ထိကောက်ခံခဲ့ကြောင်း၊ ဒီလဆန်းထဲမှာတော့ ဘတ် ၃၀၀၀ ထိ တိုးမြှင့်ကောက်ခံလာတဲ့အတွက် BGF ဘက်က မကျေနပ်ဘဲ အဆိုပါနယ်စပ်ဂိတ်တွေ ပိတ်လိုက်တယ်လို့ ဆိုပါတယ်။
အခုလို နယ်စပ်ပိတ်လိုက်ခြင်းဖြင့် နှစ်နိုင်ငံကြား ရောင်းဝယ်ဖောက်ကားနေသူတွေအတွက် အခက်အခဲဖြစ်စေပြီး ထိုင်းရဲတပ်ဖွဲ့ပုံရိပ်ကိုလည်း ထိခိုက်စေတာကြောင့် အမှတ် ၆ တိုင်းဒေသ ရဲချုပ်က စုံစမ်းစစ်ဆေးရေးကော်မတီဖွဲ့ပြီး နယ်မြေထဲ ကွင်းဆင်းစစ်ဆေးစေခဲ့ပါတယ်။
မဲဆောက်မြို့နယ်နဲ့ မယ်လမတ်မြို့နယ် ရဲတပ်ဖွဲ့ကို စစ်ဆေးချက်အရ ထိုင်းရဲဝန်ထမ်းတွေ အဆိုပါရွှေကုက္ကိုလ်ဒေသထဲထိ သွားရောက်ပြီး လိုင်းကြေးကောက်တာတွေ မရှိကြောင်း၊ နယ်စပ်ဂိတ် ၂ ခုကို BGF ဘက်က ပိတ်ထားတယ်ဆိုတာလည်း မဟုတ်မှန်ကြောင်း အမှတ် ၆ တိုင်းဒေသ ရဲဌာနချုပ် ဒုရဲမှူးချုပ် ဆမာဖွဏ်း လွတ်ဖိုအိထောင်းန်ကသတင်းထောက်တွေကို ပြောပါတယ်။
ရွှေကုက္ကိုလ်ဒေသခံတစ်ဦးကတော့ ထိုင်းရဲ ၁၀ ဦးခန့် အဲဒီမှာ လိုင်းကြေး သွားကောက်နေတာ မှန်ကန်တယ်၊ အရင်က တောင်းနေကျထက် အခုက နှစ်ဆပိုတောင်းလို့ BGF ဘက်က နယ်စပ်ဂိတ်ပိတ်မယ်လို့ ခြိမ်းခြောက်ထားကြောင်း သတင်းထောက်ကို ပြောကါတယ်။
