မလေးရှာနိုင်ငံ၊ နီဂရီဆန်လီယမ်ပြည်နယ်မှာ တရားမဝင် နေထိုင်နေတဲ့ မြန်မာနိုင်ငံသား ၁၅၃ ဦး အပါအဝင် ၂၁၆ ဦး ဖမ်းဆီးရမိခဲ့တယ်လို့ အောက်တိုဘာ ၃၁ ရက်မှာ ‌မလေးရှား လူဝင်မှုကြီးကြပ်ရေးဌာန (JIM) က ထုတ်ပြန်ပါတယ်။

မလေးရှားရဲတပ်ဖွဲ့ဝင်တွေနဲ့ လူဝင်မှုကြီးကြပ်ရေး အရာရှိတွေ ပူးပေါင်းပြီး နီဂရီဆန်လီယမ်ပြည်နယ်မှာ အောက်တိုဘာ ၂၄ ရက်မှ ၂၈ ရက်အထိ ၅ ရက်ကြာ စစ်ဆင်ရေး ၇၄ ကြိမ်အထိ ပြုလုပ်ခဲ့ပြီး မြန်မာနိုင်ငံသား ၁၅၃ ဦး၊ ဘင်္ဂလားဒေ့ရှ်နိုင်ငံသား ၂၄ ဦး၊ အင်ဒိုနီးရှားနိုင်ငံသား ၈ ဦး၊ အိန္ဒိယနိုင်ငံသား ၄ ဦး၊ ပါကစ္စတန်နိုင်ငံသား ၄ ဦးနဲ့ ကမ္ဘောဒီးယားနိုင်ငံသား ၂ ဦးတို့ကို ဖမ်း‌ဆီးရမိခဲ့ပါတယ်။

မလေးရှား လူဝင်မှုကြီးကြပ်ရေးဌာနမှူးက “စစ်ဆင်ရေး ၇၄ ကြိမ်နဲ့ နိုင်ငံခြားသား ၁,၅၉၇ ဦးကို စစ်ဆေးခဲ့ပါတယ်။ အဲ့ထဲက လူဝင်မှုကြီးကြပ်ရေး ဥပဒေကို ချိုးဖောက်တဲ့ နိုင်ငံခြားသား ၂၁၆ ဦးကို ဖမ်းဆီးခဲ့ပါတယ်။ ဖမ်းဆီးခံရတဲ့သူတွေမှာ အသက် ၂ နှစ်မှ ၁၇ နှစ်အတွင်း မြန်မာနိုင်ငံသား ကလေးငယ် ၁၀ ဦးနဲ့ ပါကစ္စတန်နိုင်ငံသား ကလေးငယ် ၁ ဦး ပါပါတယ်” လို့ ပြောပါတယ်။

ဖမ်းဆီးရမိသူတွေကို လူဝင်မှုကြီးကြပ်ရေး ထိန်းသိမ်းရေးစခန်း ပို့ဆောင်ထားပြီး တရားမဝင် ဝင်ရောက်ခြင်း၊ တရားမဝင် အလုပ်လုပ်ကိုင်ခြင်းနဲ့ လူစုလူဝေးနဲ့ နေထိုင်ခြင်းတို့အတွက် တရားစွဲဆိုသွားမှာ ဖြစ်ပါတယ်။

မလေးရှားနိုင်ငံ၊ ဂျိုဟာပြည်နယ်မှာ အောက်တိုဘာ ၁၈ ရက် ညပိုင်းကလည်း တရားမဝင် ပြည့်တန်ဆာလုပ်ငန်း လုပ်ကိုင်နေတဲ့ မြန်မာနိုင်ငံသား ၃ ဦး အပါအဝင် ၁၆ ဦး ဖမ်းဆီးခံခဲ့ရပါတယ်။

Photo - မလေးလူဝင်ကြီးကြပ်ရေးဌာန (JIM)