မန္တလေးတိုင်းမှာ အခြေစိုက်လှုပ်ရှားတဲ့ ပြည်သူ့ကာကွယ်ရေးတပ်မတော်၊ မန္တလေးက ညီနောင်မဟာမိတ်သုံးဖွဲ့ကို ထောက်ခံပြီး “တောင်သမန်စစ်ဆင်ရေး” ဆင်နွှဲသွားမယ်လို့ Mdy-PDF တာဝန်ရှိသူဆီက သိရပါတယ်။

အောက်တိုဘာလ ၂၇ ရက်မှာ ရည်ရွယ်ချက် ၅ ရပ်နဲ့ ထုတ်ပြန်ကြေညာခဲ့တဲ့ မြန်မာနိုင်ငံ အမှန်တရားနဲ့ တရားမျှတသော အမျိုးသားပါတီ(MNTJP/MNDAA)၊ မြန်မာနိုင်ငံ ရှမ်းပြည်နယ်အထူးဒေသ ၁ အုပ်ချုပ်ရေးကော်မတီ၊ မြန်မာအမျိုးသား ဒီမိုကရက်တစ် မဟာမိတ်တပ်မတော် စစ်ရေးကော်မတီ တို့ရဲ့ နိုင်ငံရေး၊ စစ်ရေးကြေညာချက်တို့ကို Mdy-PDF က ထောက်ခံတယ်လို့ ကြေညာပါတယ်။

ညီနောင်မဟာမိတ် ၃ ဖွဲ့ဖြစ်ကြတဲ့ ကိုးကန့်(MNDAA)၊ တအာင်း(TNLA)၊ ရက္ခိုင်တပ်တော်(ULA/AA) တို့ ပူးတွဲထုတ်ပြန်တဲ့ “၁၀၂၇ စစ်ဆင်ရေး” ကြေညာချက်ကို Mdy-PDF က လှိုက်လှိုက်လှဲလှဲ ကြိုဆိုထောက်ခံပြီး ညီနောင်မဟာမိတ် ၃ ဖွဲ့ရဲ့ စစ်ဆင်ရေး အထောက်အပံ့ဖြစ်စေဖို့အတွက် ပြည်သူ့ကာကွယ်ရေးတပ်မတော်(မန္တလေး) ကလည်း “တောင်သမန်” စစ်ဆင်ရေးနဲ့ ပူးပေါင်းဆင်နွှဲသွားမယ်လို့ သိရပါတယ်။

Mdy-PDF ရဲ့ ပြန်ကြားရေးတာဝန်ခံက “ညီနောင်မဟာမိတ် ၃ ဖွဲ့ရဲ့ ၁၀၂၇ စစ်ဆင်ရေးမှာ ကျနော်တို့ Mdy-PDF အနေနဲ့လည်း တောင်သမန်စစ်ဆင်ရေးနဲ့ ပူးပေါင်းပါဝင် ဆင်နွှဲသွားပါမယ်။ အသေးစိတ်တော့ ထုတ်ပြန်ဖို့မရှိသေးပါဘူး” လို့ ပြောပါတယ်။

ညီနောင်မဟာမိတ် ၃ ဖွဲ့က အောက်တိုဘာလ ၂၇ ရက် မနက် ၄ နာရီအချိန်ကစတင်ပြီး ရှမ်းပြည်နယ်မြောက်ပိုင်းမှာ “၁၀၂၇ စစ်ဆင်ရေး” ဆင်နွှဲနေတဲ့အတွက် မူဆယ်၊ လားရှိုး၊ ချင်းရွှေဟော်၊ နမ့်ခမ်း၊ နန့်ဖတ်ကာ စတဲ့ ဒေသတွေမှာ တိုက်ပွဲတွေပြင်းထန်နေပါတယ်။