
ငလျင်နောက်ဆက်တွဲ ကယ်ဆယ်ရေးလုပ်ငန်းတွေ ထိရောက်စွာ ဆောင်ရွက်နိုင်ဖို့ တိုက်ပွဲဖြစ်ပွားနေတဲ့ နေရာတွေမှာ ထိုးစစ်တွေ မပြုလုပ်ဘဲ တလတာ တဖက်သတ် အပစ်ရပ်လိုက်ကြောင်း မြောက်ပိုင်း ညီနောင်မဟာမိတ် တိုင်းရင်းသားလက်နက်ကိုင် ၃ ဖွဲ့က ဧပြီ ၁ ရက်က ထုတ်ပြန်ကြေညာလိုက်ပါတယ်။
မတ် ၂၈ ရက်နေ့က ရစ်ချ်တာစကေး ၇.၇ အဆင့် ရှိတဲ့ အင်အားပြင်း ငလျင်လှုပ်ခတ်ခဲ့ပြီးနောက် နောက်ဆက်တွဲ ငလျင်တွေ ထပ်မံလှုပ်ခတ်နေပြီး စစ်ကိုင်း၊ မန္တလေး၊ ရှမ်းပြည်နယ်၊ ပဲခူးနဲ့ နေပြည်တော်အပါအဝင် မြန်မာနိုင်ငံအတွင်းက နေရာဒေသ အများအပြားမှာ အသက်အိုးအိမ်တွေ ထိခိုက်ဆုံးရှုံးရပြီး ဘုရားကျောင်းကန်၊ စေတီပုထိုး၊ ဗလီစတဲ့ သာသနိက အဆောက်အအုံတွေ၊ ရှေးဟောင်းယဉ်ကျေးမှု အမွေအနှစ် များစွာပျက်စီးဆုံးရှုံးခဲ့ရတယ်လို့ ထုတ်ပြန်ချက်မှာ ဖော်ပြထားပါတယ်။
ထုတ်ပြန်ချက် ကြေညာလိုက်တဲ့ ဧပြီ ၁ ရက်နေ့ကစပြီး စစ်ကောင်စီနဲ့ တိုက်ပွဲဖြစ်ပွားနေတဲ့ နေရာတွေမှာ မိမိကိုယ်ကိုယ် ခုခံကာကွယ်တဲ့ တုံ့ပြန်မှုကလွဲပြီး ထိုးစစ်ဆင် တိုက်ခိုက်တာမျိုး ပြုလုပ်မှာ မဟုတ်ဘဲ ဧပြီလ ၃၀ ထိ ၁ လတာ တစ်ဖက်သတ် အပစ်ခတ်ရပ်စဲတယ်လို့လည်း ညီနောင်မဟာမိတ် ၃ ဖွဲ့က ဆိုပါတယ်။