ရန်ကုန်မှာရှိတဲ့ တက္ကစီတွေအနေနဲ့ ဘေးလိုင်းအဝါတွေ တပ်ဆင်ပြီးပါက YRTC တံဆိပ်အဝိုင်းတွေကိုပါ ကပ်ရဦးမယ်လို့ ယာဉ်မောင်းတွေဆီက သိရပါတယ်။
အာဏာသိမ်းပြီးနောက်ပိုင်း ရန်ကုန်မှာရှိတဲ့ တက္ကစီတွေဟာ မူဝါဒအမျိုးမျိုး၊ စည်းကမ်းချက်အမျိုးမျိုး ထုတ်ခံနေရပြီး အခုအခါ ဘေးလိုင်းအဝါတွေကို YRTC က တပ်ဆင်စေခဲ့ပါတယ်။
အဲဒီလို တပ်ဆင်ပြီးတဲ့နောက် YRTC တံဆိပ်အဝိုင်းအကြီးတွေကိုလည်း ကားမှန်ရှေ့မှာ ကပ်ဖို့အတွက် YRTC က လုပ်ဆောင်နေတယ်လို့ အငှားယာဉ်မောင်းတွေက ပြောပါတယ်။
“တခုပြီးတခု မပြီးတော့ဘူး။ အခု အဝါလိုင်းကပ်တာ ၁ သောင်းခွဲလောက်ကုန်တယ်။ နောက်တခါ YRTC တံဆိပ်ကပ်ရဦးမယ်တဲ့။ အဲဒါက ၂ သောင်းလောက် ကုန်ဦးမယ်။ ဘယ်တော့ လုပ်ရမယ်တော့ မသိရသေးဘူး” လို့ အငှားယာဉ်မောင်းတဦးက ပြောပါတယ်။
ရန်ကုန်မှာ အောက်တိုဘာ ၂၃ ရက်နေ့အထိ တက္ကစီ ယာဉ်အစီးရေ ၁ သောင်းကျော်ကို ဘေးလိုင်းအဝါတွေ တပ်ဆင်ပြီးပြီလို့ YRTC ဆီက သိရပါတယ်။
ဘေးလိုင်းအဝါ တပ်ဆင်တာကို YRTC က စတစ်ကာဖိုး ၅ ထောင် နဲ့ လက်ခတို့ကို မယူဘဲ တပ်ဆင်ပေးမယ်ဆိုပေမယ့် အမှန်တကယ် သွားရောက်တပ်ဆင်တဲ့နေရာမှာ ဝန်ထမ်းတွေက ကပ်ပေးရတဲ့ ကားတိုင်းကို လက်ဖက်ရည်ဖိုး တောင်းခံတာတွေရှိတယ်လို့ အငှားယာဉ်မောင်းတွေက ပြောပါတယ်။
ရန်ကုန်လိုင်စင်တွေပဲ အခုလို ဘေးလိုင်းအဝါတပ်ဆင်ရတာဖြစ်ပြီး နယ်လိုင်စင်နဲ့ ကားတွေကတော့ တပ်ဆင်ရတာမျိုးမရှိဘူးလို့လည်း သိရပါတယ်။
ရန်ကုန်မှာ အငှားယာဉ် ၆ သောင်းကျော်ရှိပြီး တံခါးဘေးမှာ ကပ်ရတဲ့ City Taxi တံဆိပ်အတွက် ကျပ် ၃ သောင်းခွဲ၊ ကပ်ခ ၂ ထောင်၊ YRTC အသင်းဝင်ကြေး ကျပ် ၁ သောင်း ၈ ထောင်လောက် ကုန်ကျနေပါတယ်။
