၉ တန်နဲ့အထက် ကုန်ကားတွေဟာ ကုန်စည်ပို့ဆောင်ရေးအသင်းတခုခုကို မဝင်ထားဘူးဆိုရင် လိုင်စင်လျှောက်တာ၊ သက်တမ်းတိုးတာတွေ မလုပ်ပေးတော့ဘူးလို့ သိရပါတယ်။

အဝေးပြေးကုန်စည်ပို့ဆောင်ရေးကို E-lock စနစ် ကျင့်သုံးနိုင်ရေးအတွက် ပို့ဆောင်ရေးစီမံကိန်းဦးစီးဌာနက အကောင်အထည်ဖော်နေတာကြောင့် ၉ တန်နဲ့ အထက် ကုန်တင်ယာဉ်တွေအနေနဲ့ အသင်းတခုခုမှာဝင်ထားကြဖို့ အသိပေး ကြေညာနေကြပါတယ်။

မြန်မာနိုင်ငံ၊ အဝေးပြေး ကုန်စည်ပို့ဆောင်ရေးဝန်ဆောင်မှု လုပ်ငန်းရှင်များအသင်း တာဝန်ရှိသူတယောက်က "အဓိက ကတော့ အသင်းမဝင်ထားတဲ့ ကုန်တင်ယာဉ်တွေကို ကုန်စည်သယ်ယူပို့ဆောင်တဲ့လုပ်ငန်း လုပ်ကိုင်ခွင့်လိုင်စင် အသစ်လျှောက်တာတွေနဲ့ သက်တမ်းတိုးတာတွေကို မလုပ်ပေးတော့ဘူး။ လောလောဆယ်တော့ E-lock စနစ် အတွက် အသင်းဝင်တွေကို Digital နည်းနဲ့ အသင်းဝင်နိုင်ဖို့ စီစဥ်ပေးထားပါတယ်။ နောက်ပိုင်းကျရင် QR ကုဒ်နဲ့ အသင်းဝင်နိုင်ဖို့ဆောင်ရွက်ပေးသွားမှာပါ” လို့ ပြောပါတယ်။

မြန်မာနိုင်ငံ အဝေးပြေးကုန်စည်ပို့ဆောင်ရေး ဝန်ဆောင်မှုလုပ်ငန်းရှင်များအသင်းဟာ ရန်ကုန်၊ ပဲခူး၊ မန္တလေး၊ စစ်ကိုင်းနဲ့ မကွေးတိုင်း၊ ကရင်၊ ကချင်၊ ရှမ်းပြည်နယ်(တောင်ပိုင်း၊ မြောက်ပိုင်း၊ အရှေ့ပိုင်း)တို့မှာ အသင်းခွဲ ၈ သင်းရှိတယ်လို့ သိရပါတယ်။

လတ်တလောမှာတော့ အဝေးပြေးကုန်စည်ပို့ဆောင်ရေးမှာ E-Lock စနစ်ကို မကျင့်သုံးခင် ကုန်တင်လွှာ ယာဉ်ပါ/ ကုန်ပါစာရင်းချုပ်နဲ့ ကုန်သွယ်မှု လမ်းကြောင်း တလျှောက် စိစစ်ဆောင်ရွက်နေတယ်လို့ သိရပါတယ်။

ကုန်စည်ပို့ဆောင်ရေးအသင်းတွေကတော့ မြန်မာနိုင်ငံ အပြည်ပြည်ဆိုင်ရာ ကုန်စည် ပို့ဆောင်ရေး ဝန်ဆောင်မှု လုပ်ငန်းရှင်များအသင်း၊ မြန်မာနိုင်ငံ ကုန်သေတ္တာတင် မော်တော်ယာဉ်များအသင်းနဲ့ မြန်မာနိုင်ငံ အဝေးပြေး ကုန်စည်ပို့ဆောင်ရေးဝန်ဆောင်မှု လုပ်ငန်းရှင်များအသင်းတို့ဖြစ်ပြီး အသင်းတခုခုမှာ မှတ်ပုံတင် အသင်းဝင်နိုင်တယ်လို့ သိရပါတယ်။