ညောင်လေးပင်ခရိုင်အတွင်းမှာ တိုက်ပွဲတွေဖြစ်ပွားနေပြီး စစ်ကောင်စီတပ်တွေက စားနပ်ရိက္ခာနဲ့ ဆေးဝါးတွေ တားဆီးကန့်သတ် ဖမ်းဆီးတာတွေကြောင့် ပြည်သူနဲ့ စစ်ဘေးရှောင် ၁၀၀၀၀ ကျော် အခက်အခဲတွေနဲ့ ရင်ဆိုင်နေရတယ်လို့ ဒေသခံတွေက ပြောပါတယ်။
ကရင်အမျိုးသားအစည်းအရုံး (KNU) တပ်မဟာ ၃ နယ်မြေအတွင်း စစ်ကောင်စီတပ်တွေက စစ်ကြောင်းထိုး ဝင်ရောက်လာတာကြောင့် တိုက်ပွဲတွေဖြစ်ပွားနေတဲ့အပြင် လက်ရှိမှာလည်း စစ်ကောင်စီတပ်တွေက စားနပ်ရိက္ခာနဲ့ ဆေးဝါးတွေ သယ်ယူရာမှာ ကန့်သတ်တားဆီးပိတ်ပင်တာတွေ ရှိတယ်လို့ ဆိုပါတယ်။
ဒါအပြင် လူတယောက်ကို ဆီ ရေသန်းဘူး ၁ ဘူးနဲ့ ဆန် ၄ ပြည်ထက် ပိုမိုသယ်ဆောင်ခွင့်မပြုတဲ့အပြင် ဆေးဝါးနဲ့စက်သုံးဆီ သယ်ယူခွင့်ကို လုံးဝပိတ်ပင်ထားပါတယ်။
စစ်ကောင်စီတပ်ရဲ့ တားဆီးပိတ်ပင်မှုတွေကြောင့် စစ်တောင်းမြစ်အရှေ့ခြမ်းမှာ ဆန် ၁ အိတ်ကို ကျပ် ၁၀၀,၀၀၀ ကျော်၊ စားဆီ ၁၀ ပိဿာ ပုံး ၁ ပုံးကို ၁၁၀,၀၀၀ ကျပ်၊ စက်သုံးဆီ ၁ ဂါလန် ၁၅,၀၀၀ ကျပ်အထိ ဈေးနှုန်းမြင့်တက်ခဲ့ပါတယ်။
ဒေသခံပြည်သူတဦးက "လက်ရှိအခြေအနေက ဒေဒသခံပြည်သူတွေ စားနပ်ရိက္ခာဝယ်ယူတဲ့နေရာမှာ အကျပ်အတည်းတွေဖြစ်တယ်။ ပြီးခဲ့တဲ့ ၁ ရက်၊ ၂ ရက်က အသေပိတ်လိုက်တယ်။ ဆိုင်ကယ်နဲ့တော့ သွားလို့ရတယ်။ သုံးဘီးနဲ့ လုံးဝ သယ်ခွင့်မပြုဘူး။ အဲဒီအခက်အခဲတွေကတော့ လက်ရှိအခြေအနေမှာ ဒေသခံတွေ ကြုံတွေ့နေရတယ်" လို့ ပြောပါတယ်။
စက်တင်ဘာ ၃၀ ရက်က ပဲခူးတိုင်း၊ ညောင်လေးပင်မြို့နယ်၊ ပုဇွန်မြောင်းကျေးရွာအနီးကို စစ်ကောင်စီတပ်တွေ အင်အားဖြည့်တင်းဝင်ရောက်လာတာကြောင့် အောက်တိုဘာ ၁ ရက်က စတင်ပြီး ၂ ရက်အထိ တော်လှန်ရေးပူးပေါင်းတပ်ဖွဲ့တွေနဲ့ တိုက်ပွဲတွေဖြစ်ပွားခဲ့ပါတယ်။
နှစ်ဖက်တိုက်ပွဲဖြစ်ပွားပြီးနောက် ပုဇွန်မြောင်းကျေးရွာ ဘုန်းကြီးကျောင်းက ဦးဇင်း ၁ ပါးနဲ့ ဒေသခံ ၂ ယောက်ကို ဖမ်းဆီးပြီးနောက် ဦးဇင်း ၁ ပါးနဲ့ ဒေသခံ ၁ ယောက်ကို သတ်ဖြတ်ခဲ့တယ်လို့ ကရင်အရေးပေါ်ကူညီကယ်ဆယ်ရေးအဖွဲ့ တာဝန်ရှိသူက ပြောပါတယ်။
အောက်တိုဘာ ၁ ရက်ကစတင်ပြီး ၂ ရက်အထိ တပ်မဟာ ၃ နယ်မြေ ညောင်လေးပင်မြို့နယ်၊ ပုဇွန် မြောင်းကျေးရွာမှာ တိုက်ပွဲပြင်းထန်ခဲ့ရာ တိုက်ပွဲအတွင်း စစ်ကောင်စီတပ်ဘက်က အရာရှိအပါအဝင် ၁၅ ယောက်နီးပါးသေဆုံးပြီး ၁၀ ယောက် ဒဏ်ရာရရှိခဲ့ပါတယ်။
ဒါအပြင် သေနတ် ၁ လက်နက်သိမ်းဆည်းရမိခဲ့ တဲ့အပြင် စစ်ကား ၁ စီးကိုပါ မီးရှို့ဖျက်ဆီးခဲ့ပါတယ်။ တိုက်ပွဲအတွင်း တော်လှန်ရေးပူးပေါင်းတပ်ဖွဲ့ဘက်က ရဲဘော် ၄ ယောက် ဒဏ်ရာရရှိခဲ့ပြီး လက်ရှိမှာလည်း နှစ်ဖက်စစ်ရေးတင်းမာနေတယ်လို့ Royal Peacock Column က ထုတ်ပြန်ခဲ့ပါတယ်။
နှစ်ဖက်တိုက်ပွဲအတွင်း စစ်ကောင်စီတပ်ဘက်က သေဆုံးဒဏ်ရာရရှိမှု အခြေအနေကိုတော့ ဒီဗွီဘီအနေနဲ့ သီးခြားအတည်မပြုနိုင်သေးပါဘူး။
