မန်ချက်စတာယူနိုက်တက်အသင်းဟာ ရလဒ်ဆိုးတွေ ဆက်ပြီး ကြုံတွေ့လာဦးမှာဖြစ်ပြီး အခြေအနေတွေကို အချိန်တိုအတွင်းမှာ ပြုပြင်နိုင်ဖို့ မလွယ်ကြောင်း အင်္ဂလန်နောက်ခံလူဟောင်း မီကာရစ်ချက်က ပြောပါတယ်။

မန်ယူအသင်းဟာ ဒီတစ်ပတ်ပရီးမီးယားလိဂ်မှာ ခရစ္စတယ်ပဲလေ့ကို အိမ်ကွင်းမှာ အရှုံးပေးခဲ့ရပြီး ပွဲစဉ် ၇ ပွဲအပြီးမှာ ၃ ပွဲနိုင် ၄ ပွဲ ရှုံး ရလဒ်နဲ့ အဆင့် ၁၀ မှာ ရပ်တည်နေတာပါ။

ယူနိုက်တက်အသင်းရဲ့ အခြေအနေတွေက စိတ်ပျက်စရာကောင်းပြီး ထိပ်ဆုံးလေးသင်းနဲ့ ၇ မှတ်ကွာဟနေသလို၊ ၇ ပွဲမှာ ၇ ဂိုး ပဲ သွင်းနိုင်တာကလည်း ထိပ်တန်းအသင်းတွေရဲ့ ရဂိုးအရေအတွက်နဲ့ ကွာဟချက်ကြီးမားနေကြောင်း မီကာရစ်ချက်က ပြောပါတယ်။

အသင်းရဲ့အခြေအနေတွေဟာ အချိန်တိုအတွင်းမှာ ကုစားဖို့ မလွယ်တာကြောင့် ဆက်လက်ပြီး ရလဒ်ဆိုးတွေရှိလာဦးမှာ ဖြစ်ကြောင်းလည်း သူကပြောပါတယ်။

မန်ယူအသင်းမှာ နောက်ခံလူတွေ ဒဏ်ရာပြဿနာရှိနေတာက အားနည်းချက်တစ်ခုဖြစ်နေပြီး တိုက်စစ်ပိုင်းက အဆုံးသတ်ညံ့ဖျင်းမှုဟာလည်း ရလဒ်ဆိုးတွေရဲ့ အဓိကအချက်တွေအဖြစ် ဗြိတိန်မီဒီယာတွေက သုံးသပ်ကြပါတယ်။ 

Photo-Reuters