ထိုင်းနိုင်ငံအလယ်ပိုင်း၊ အယုဒ္ဓယခရိုင်၊ ဝမ်းနွဲ့မြို့နယ်ထဲမှာ ပြီးခဲ့တဲ့ စနေ့နေ့ ( စက်တင်ဘာ ၂ ရက် ) ညက တရားမဝင် ဝင်ရောက်လာတဲ့ မြန်မာပြည်က ရိုဟင်ဂျာ ၂၁ ဦးကို ဖမ်းဆီးရမိတယ်လို့ ထိုင်းသတင်းတွေမှာ ဖော်ပြပါတယ်။
နယ်မြေထဲမှာ တရားမဝင်အလုပ်သမားတွေ တင်ဆောင်လာမယ့်အကြောင်း ကြိုတင်သတင်းရထားတဲ့အတွက် အဝေးပြေးလမ်းတာဝန်ကျရဲတပ်ဖွဲ့နဲ့ တာဝန်ရှိသူတွေဟာ ဖဟွန်ယိုးထင်း လမ်းမကြီးပေါ်မှာ စောင့်ကြပ်စစ်ဆေးစဉ် ည ၈ နာရီလောက်မှာ အလေးချိန်တန်ပို တင်ဆောင်လာတဲ့ အညိုရောင် တိုယိုတာဖော်ကျူနာဟိုင်းလပ်စ်ကား ၁ စီးကို တွေ့ရတယ်လို့ ဆိုပါတယ်။
တာဝန်ရှိသူတွေဟာ အဆိုပါကားကိုစစ်ဆေးဖို့ ရပ်မိန့်ပေးလိုက်ပေမယ့် ရပ်မပေးတဲ့အပြင် မိုးရေထဲမှာ အရှိန်မြှင့်ပြီးမောင်းပြေးသွားကြောင်း ၊ ဒါကြောင့် ရဲတွေက ကား ၂ စီးနဲ့ အနောက်ကနေ လိုက်သွားပြီး ၅ ကီလိုမီတာအကွာအဝေးမှာ လိုက်မီလာကာ အဲဒီကားရဲ့ တဘက် တချက်မှာ ပိတ်ဆို့လိုက်တယ်လို့ ဆိုပါတယ်။
ကားမောင်းသမားက သူ့ကားကိုရပ်လိုက်ပြီး ထွက်ပြေးဖို့ကြိုးစားပေမယ့် တာဝန်ရှိသူတွေက ဖမ်းဆီးနိုင်ခဲ့ပြီး ကားထဲမှာလည်း အမျိုးသားအမျိုးသမီး စုစုပေါင်း ၂၁ ဦး ကြပ်ညှပ်ပြီးလိုက်ပါလာကြတယ်လို့ ဆိုပါတယ်။
သူတို့တွေမှာ ထိုင်းနိုင်ငံထဲ ဝင်ရောက်လာတဲ့ အထောက်အထားတစုံတရာမရှိကြောင်း၊ ယာဉ်မောင်းသမား နိုင်းဆုမ်ချိုင်းကတော့ အဲဒီလူတွေကို တာ့ခ်ခရိုင်ကနေ စမွတ်ပရကန်ကို ပို့ဆောင်ပေးဖို့ နိုင်းလီဆိုသူ ၁ ဦးက သူ့ကိုစေခိုင်းခဲ့တယ်၊ ကားခ ဘတ် ၁၅၀၀၀ ရပြီး မဲ့ထော့မြို့နယ်ရှိ တောစပ်တစ်ခုကနေသွားကြိုလာတာလို့ ဆိုပါတယ်။ ဒီလိုတရားမဝင်သူတွေ သယ်ဆောင်ခဲ့တာ ၂ ကြိမ်ရှိပြီလို့လည်း ဝန်ခံသွားပါတယ်။
ကားပေါ်ကလူတွေဟာ မြန်မာပြည်က ရိုဟင်ဂျာတွေဖြစ်ပြီး နယ်စပ်တောလမ်းကနေတဆင့် ထိုင်းနိုင်ငံ တာ့ခ်ခရိုင်ထဲကို ဝင်လာကြောင်း၊ အဖိုးအခတွေကိုတော့ လိုရာခရီးရောက်မှ ပေးချေရမှာမို့ ဘယ်လောက်ကုန်မယ်မှန်းမသိသေးဘူးလို့ ဆိုပါတယ်။
တာဝန်ရှိသူတွေက သူတို့ ၂၂ ဦးလုံးကို လဝကဥပဒေနဲ့အရေးယူဖို့ ဝမ်နွဲ့နယ်မြေရဲစခန်းကို ပို့ဆောင်ထားတယ်လို့ ဆိုပါတယ်။
