ဂါဘွန်နိုင်ငံမှာ သမ္မတ အလီဘွန်ဂိုက တတိယမြောက်သက်တမ်းကို အနိုင်ရရှိကြောင်း ပြည်နယ်ရွေးကောက်ပွဲကော်မရှင်က ကြေညာပြီး မိနစ်ပိုင်းလေးအကြာ သြဂုတ်လ ၃၀ ရက် အစောပိုင်းမှာ နိုင်ငံတော်ရုပ်မြင်သံကြားကနေ ဂါဘွန်စစ်တပ် အကြီးတန်းအရာရှိအဖွဲ့တဖွဲ့ ပေါ်လာခဲ့ပြီးတော့ သူတို့ နိုင်ငံ့အာဏာသိမ်းလိုက်ပြီ ကြေညာခဲ့ပါတယ်။

ဂါဘွန် 24 ရုပ်မြင်သံကြား ချန်နယ်လိုင်းမှာ ပေါ်လာတဲ့ အရာရှိတွေက သူတို့ဟာ ဗဟိုအာဖရိကနိုင်ငံရှိ လုံခြုံရေးနဲ့ ကာကွယ်ရေးတပ်ဖွဲ့ အားလုံးကို ကိုယ်စားပြုတယ်လို့ ပြောပါတယ်။

အဖွဲ့အစည်းများ အသွင်ကူးပြောင်းရေးနဲ့ ပြန်လည်ထူထောင်ရေးကော်မတီ CTRI အတွင်း အစည်းအဝေးကနေ လက်ရှိအစိုးရကို အဆုံးသတ်ခြင်းအားဖြင့် ငြိမ်းချမ်းရေးကို ကာကွယ်ဖို့ ဆုံးဖြတ်ခဲ့တယ်လို့ ဆိုပါတယ်။

ဒါ့အပြင် ရွေးကောက်ပွဲရလဒ်တွေကိုလည်း ဖျက်သိမ်းလိုက်ကြောင်း၊ နောက်ထပ် အသိပေးချက်တွေ မထုတ်ပြန်ခင်အထိ နယ်စပ်အားလုံးကို ပိတ်ထားကြောင်း၊ ပြည်နယ်အဖွဲ့အစည်းတွေကို ဖျက်သိမ်းကြောင်း သူတို့က ပြောပါတယ်။

ထာဝရငြိမ်းချမ်းရေးရဲ့ ဆိပ်ခံနယ်မြေတခုဖြစ်တဲ့ ဂါဘွန်နိုင်ငံဟာ ဒီကနေ့မှာ အဖွဲ့အစည်းဆိုင်ရာ၊ နိုင်ငံရေး၊ စီးပွားရေးနဲ့ လူမှုရေးဆိုင်ရာတွေမှာ ပြင်းထန်တဲ့ အကျပ်အတည်းတွေကို ဖြတ်သန်းနေရတာဖြစ်ပြီး အထွေထွေရွေးကောက်ပွဲလို့ သိကြတဲ့ ၂၀၂၃ ခုနှစ် ဩဂုတ် ၂၆ ရက် ရွေးကောက်ပွဲဟာ ပွင့်လင်းမြင်သာတဲ့ မဲဆန္ဒပေးမှု အခြေအနေတွေနဲ့ မကိုက်ညီတာကို ဝန်ခံကြောင်းလည်း ဂါဘွန် စစ်အရာရှိက ပြောပါတယ်။

ဒါ့အပြင် တာဝန်မဲ့ပြီး မှန်းဆမရတဲ့ အုပ်ချုပ်မှုစနစ်ဟာ လူမှုရေး စည်းလုံးညီညွတ်မှုကို ပျက်ယွင်းသွားစေပြီး တိုင်းပြည်ကို ဖရိုဖရဲဖြစ်စေဖို့ ခြိမ်းခြောက်နေကြောင်းလည်း ဆိုပါတယ်။

ဂါဘွန်စစ်အရာရှိတွေ ရုပ်မြင်သံကြားမှာ ပေါ်လာပြီးနောက် မြို့တော် လီဘရာဗီးလ်မှာ သေနတ်သံတွေ ကျယ်ကျယ်လောင်လောင် ကြားနေရတယ်လို့ ရိုက်တာသတင်းထောက်က ပြောပါတယ်။

ရေနံတင်ပို့တဲ့ နိုင်ငံများအဖွဲ့ (OPEC) ရဲ့ အဖွဲ့ဝင်နိုင်ငံတွေမှ အစိုးရတွေကတော့ ချက်ချင်း မှတ်ချက်ပေးခြင်းမရှိပါဘူး။

ဂါဘွန်နိုင်ငံရဲ့ အာဏာသိမ်းကိစ္စနဲ့ပတ်သက်ပြီး အခြေအနေတွေကို ဥရောပသမဂ္ဂရဲ့ ကာကွယ်ရေးဝန်ကြီးတွေ ဆွေးနွေးသွားမှာဖြစ်ကြောင်းနဲ့ အာဏာသိမ်းမှုဟာ အတည်ပြုလိုက်ရင် ဒေသတွင်း မတည်မငြိမ်မှုတွေ ပိုများပြားလာမှာဖြစ်ကြောင်း အီးယူ နိုင်ငံခြားရေးမူဝါဒ အကြီးအကဲ ဂျိုးဆက်ဖှ် ဘော်ရဲလ်က သြဂုတ် ၃၀  ရက်မှာ ပြောပါတယ်။

Source/Photo - Reuters