စစ်ကောင်စီကို ဝေဖန်မှုနဲ့ ဖမ်းဆီးခံနေရတဲ့ ဟစ်ပ်ဟော့ပ်အဆိုတော် ဗျူဟာ ကို သြဂုတ် ၂၃ ရက်မှာ အင်းစိန်ထောင်တွင်း တရားရုံးကနေ ထောင်ဒဏ်အနှစ် ၂ဝ ချမှတ်ခဲ့တယ်လို့ မိသားစုနဲ့ နီးစပ်သူတွေဆီက သိရပါတယ်။
မိသားစုနဲ့ နီးစပ်သူတဦး “၅ဝ၅(က) နဲ့ပဲ ဆွဲရာကနေ ပုဒ်မ ၁၂၄ ထပ်တိုးပြီး ဒီကနေ့ (ဩဂုတ် ၂၃ ) မနက်ပဲ အင်းစိန်ခုံရုံးကနေ အမိန့်ချတာပါ။ ကိုဗျူဟာ့ကျန်းမာရေး ကောင်းပါတယ်။ စိတ်တော့သိပ်ကောင်းမယ်မထင်ဘူး။ ဘာမှတော့ မပြောချင်တော့ပါဘူး၊ သူတို့ခေတ်ပဲကိုး” လို့ ပြောပါတယ်။
လူငယ်အဆိုတော် ဗျူဟာက စစ်ကောင်စီလက်အောက်ခံ လျှပ်စစ်နဲ့စွမ်းအင်ဝန်ကြီး အပါအဝင် လျှပ်စစ်ဌာနဝန်ထမ်းတွေကို ထိထိရောက်ရောက် ဝေဖန်ထားပြီး အရပ်သားအစိုးရ အုပ်ချုပ်ကာလ ၅ နှစ်နဲ့ စစ်ကောင်စီ အုပ်ချုပ်ကာလ လျှပ်စစ်မီး ရရှိ/ပြတ်တောက်မှုတွေကို ဝေဖန်ထားတဲ့ ဗွီဒီယိုဖိုင်ကို မျှဝေအပြီးမှာ စစ်ကောင်စီရဲ့ ဖမ်းဆီးတာကို ခံလိုက်ရတာပါ။
အဆိုတော်ဗျူဟာ ဖမ်းဆီးခံရပြီး စခန်းပြန်ပို့တဲ့အချိန်အထိ မိသားစုနဲ့ ၄/၅ ကြိမ်လောက် တွေ့ခွင့်ရခဲ့ပေမဲ့ ဇွန်လ ၆ ရက်နေ့ အင်းစိန်ထောင်ကို ပို့ဆောင်ခံရပြီး နောက်ပိုင်း ထောင်ဒဏ်ချမှတ်ခံရတဲ့အချိန်ထိ မိသားစုနဲ့ ထပ်တွေ့ဆုံခွင့်မရတော့ပါဘူး။
အဆိုတော်ဗျူဟာ,ဟာ နာမည်ကြီး တေးရေးဆရာ နိုင်မြန်မာရဲ့ သားဖြစ်ပြီး သူ ထောင်ဒဏ်ချမှတ်ခံရစဉ်မှာ အမျိုးသမီးနဲ့ ကလေးနှစ်ယောက် ကျန်ရစ်ခဲ့ပါတယ်။
