ဂျပန်နိုင်ငံ ချီးဘားမြို့မှာ ကျင်းပမယ့် ၁၁ ကြိမ်မြောက် “U12 Junior Soccer World Challenge 2023” ပြိုင်ပွဲ အုပ်စုမဲခွဲပွဲမှာ မြန်မာယူ-၁၂ လက်ရွေးစင်အသင်းဟာ အုပ်စု ဂ မှာ စပိန်နာမည်ကြီးကလပ် ဘာစီလိုနာ၊ ဂျပန်ကလပ်တွေဖြစ်တဲ့ ဂျေအီးအက်ဖ်ယူနိုက်တက် ချီးဘားနဲ့ Daiwa House Dream အသင်းတို့နဲ့ တွေ့ဆုံနေပါတယ်။
ကမ္ဘာ့ယူ-၁၂ ဖိတ်ခေါ်ဖလားပြိုင်ပွဲကို သြဂုတ် ၂၄ ရက်ကနေ ၂၇ ရက်နေ့အထိ အသင်း ၃၂ သင်းနဲ့ အုပ်စု ၈ ခုခွဲပြီး ယှဥ်ပြိုင်သွားမှာ ဖြစ်ပါတယ်။
လက်ရှိမှာ မြန်မာယူ-၁၂ အသင်းဟာ ဆန်ခါတင်ကစားသမား ၂၅ ဦးကို သုဝဏ္ဏအားကစားကွင်း လက်ရွေးစဥ်များအဆောင်မှာ ထားရှိပြီး စခန်းသွင်း လေ့ကျင့်နေပါတယ်။
သြဂုတ်လဒုတိယပတ်မှာ ဆန်ခါတင် ကစားသမား ၂၅ ဦးထဲက ၁၈ ဦးကို ရွေးချယ်ပြီး ဂျပန်နိုင်ငံကို ထွက်ခွာမှာဖြစ်ပါတယ်။
မြန်မာ့လက်ရွေးစင် ယူ-၁၂ အသင်းကို နည်းပြချုပ်အဖြစ် ဦးအောင်ကျော်ဇံက ကိုင်တွယ်မှာ ဖြစ်ပါတယ်။
“U12 Junior Soccer World Challenge” ပြိုင်ပွဲကို ၂၀၁၃ က စတင်ယှဥ်ပြိုင်ခဲ့တာဖြစ်ပြီး ဘာစီလိုနာအသင်းက ၅ ကြိမ်နဲ့ အများဆုံး ဗိုလ်စွဲထားပါတယ်။
