လူကြောင့်ဖြစ်တဲ့ ရာသီဥတုပြောင်းလဲမှုနဲ့ အယ်လ်နီညို အားကောင်းလာချိန်မှာ ဝင်ရိုးစွန်းဒေသတွေ မပါတဲ့ ကမ္ဘာ့သမုဒ္ဒရာမျက်နှာပြင် ပျမ်းမျှအပူချိန်ဟာ ဩဂုတ် ၂၂ ရက်က ၂၁ ဒသမ ၁ ဒီဂရီ ဆဲလ်စီးယပ်စ်နဲ့ စံချိန်သစ်တင်ခဲ့ပါတယ်။
ဒါဟာ ၂၀၂၄ ခုနှစ် မတ်လက သီးခြားရက်သုံးရက်မှာ မှတ်တမ်းတင်ခဲ့တဲ့ ၂၁ ဒသမ ၀၉ ဒီဂရီ စံချိန်ကို အနည်းငယ် ကျော်လွန်ခဲ့တာဖြစ်ပါတယ်။
ဒီအချက်အလက်ကို ပင်လယ်ရေအနက် ၁၀ မီတာက အပူချိန်တွေကို ရေပေါ်တိုင်းတာရေး ကိရိယာတွေ၊ သင်္ဘောတွေနဲ့ ဂြိုဟ်တုတွေကနေ တိုင်းတာပြီး တွက်ချက်ထားတာဖြစ်ပါတယ်။
ပင်လယ်ရေအပူချိန်ဟာ ပုံမှန်အားဖြင့် မတ် ဒါမှမဟုတ် ဧပြီမှာ အမြင့်ဆုံးရောက်လေ့ရှိလို့ ဩဂုတ်လမှာ စံချိန်သစ်တင်တာကို သိပ္ပံပညာရှင်တွေက အထူးစိုးရိမ်နေကြပါတယ်။
အရှေ့နဲ့ အလယ်ပိုင်း အပူပိုင်းပစိဖိတ်သမုဒ္ဒရာက ရေနွေးတွေကို မျက်နှာပြင်ဆီ တက်လာစေတဲ့ အယ်လ်နီညိုဟာ ဒီဇင်ဘာလအထိ ပိုအားကောင်းလာနိုင်ပါတယ်။
Copernicus ရဲ့ ဒေါက်တာ ဆာမန်သာ ဘာဂက်စ်က “ဒီစံချိန်က သမုဒ္ဒရာတွေအပေါ် ဖိအားပိုများလာနေပြီဆိုတဲ့ ရှင်းလင်းတဲ့ အချက်ပြမှုတခုဖြစ်တယ်” လို့ ပြောပါတယ်။
ဖန်လုံအိမ်ဓာတ်ငွေ့ကြောင့် ကမ္ဘာကြီးမှာ ပိုလျှံလာတဲ့အပူ ၉၀ ရာခိုင်နှုန်းကျော်ကို သမုဒ္ဒရာတွေက စုပ်ယူထားပါတယ်။ ပူနွေးတဲ့ပင်လယ်ရေက မုန်တိုင်းတွေကို ပိုပြင်းထန်စေပြီး ပင်လယ်ရေမျက်နှာပြင်မြင့်တက်မှုနဲ့ ကမ်းရိုးတန်းရေကြီးမှုအန္တရာယ်ကိုလည်း တိုးစေပါတယ်။
ကမ္ဘာတဝန်း ပင်လယ်အပူလှိုင်းဖြစ်တဲ့ ရက်အရေအတွက်ဟာ ၁၉၉၀ ပြည့်နှစ်အစောပိုင်းကထက် ၃ ဆကျော်လာပြီး သန္တာကျောက်တန်းတွေနဲ့ အဏ္ဏဝါဂေဟစနစ်တွေကို ထိခိုက်စေပါတယ်။
အယ်လ်နီညို ဆက်အားကောင်းလာရင် ၂၀၂၇ ခုနှစ် မတ် ဒါမှမဟုတ် ဧပြီမှာ ဒီစံချိန် ထပ်ချိုးနိုင်တယ်လို့ သိပ္ပံပညာရှင်တွေက ခန့်မှန်းပါတယ်။
