ဝက်စ်ဟမ်းအသင်းဟာ နောက်ခံလူ မက်ဂွဲယားကို အငှားနဲ့ခေါ်ယူဖို့ ကမ်းလှမ်းခဲ့ပေမဲ့ မန်ယူအသင်း ကပယ်ချလိုက်ပါတယ်။

အင်္ဂလန်နောက်ခံလူဟာ ယူနိုက်တက်အသင်းခေါင်းဆောင်တာဝန်ကနေ ရုပ်သိမ်းခံခဲ့ရပြီးနောက် အသင်းမှာ ဆက်ရှိဖို့ မရေမရာဖြစ်လာခဲ့တာပါ။

ဝက်စ်ဟမ်းအသင်းဟာ လာမယ့်ရာသီမှာ ယူရိုပါလိဂ်ပြိုင်ပွဲကစားရမှာဖြစ်လို့ ခံစစ်ပိုင်း တောင့်တင်းဖို့အတွက် မက်ဂွဲယားကို ခေါ်ယူဖို့ ကမ်းလှမ်းခဲ့တာပါ။

မန်ယူအသင်းအနေနဲ့ မက်ဂွဲယားကို ပွဲထွက်ခွင့်အာမခံချက်ပေးမှာ မဟုတ်ပေမဲ့ ဝက်စ်ဟမ်းရဲ့ ကမ်းလှမ်းချက်ကိုတော့ ပယ်ချခဲ့တာဖြစ်ကြောင်း တယ်လီဂရပ်ဖ် သတင်းမှာဖော်ပြပါတယ်။

မက်ဂွဲယားဘက်ကတော့ အသင်းခေါင်းဆောင်တာဝန်ကနေ ဖယ်ရှားခံရတဲ့အပေါ် အလွန်စိတ်ပျက်မိပေမဲ့ အသင်းအတွက် ဆက်လက်ကြိုးစားကစားသွားမယ်လို့ ကြေညာထားပါတယ်။