မကွေးတိုင်း၊ ရေစကြိုမြို့မှာ ဧပြီ ၁ ရက် မွန်းလွဲပိုင်းက စစ်ကောင်စီတပ်သားတွေ တိုက်ခိုက်ခံရပြီး ၃ ယောက် သေဆုံးကာအများအပြား ဒဏ်ရာရရှိခဲ့တယ်လို့ ရေစကြိုမြို့နယ် ပကဖက သိရပါတယ်။

အမှတ်(၈) သုခဝတီရပ်ကွက်၊ ကပ်ကျော်ဘုန်းကြီးကျောင်းမှာ တပ်စွဲထားတဲ့ စစ်ကောင်စီတပ်ကို မနေ့ မွန်းလွဲ ၂ နာရီလောက်မှာ မိုင်း ၆ လုံးဆွဲပြီး တိုက်ခိုက်ခဲ့တယ်လို့ ရေစကြိုမြို့နယ် ပကဖ ခေါင်းဆောင် ရဲဘော်ဝေကြီးက ပြောပါတယ်။

အဲဒီတိုက်ခိုက်မှုအတွင်းမှာ စစ်တပ်က ၂ ယောက် ပွဲချင်းပြီးသေဆုံးကာ ၁ ယောက်ကတော့ ဆေးရုံမှာ သေဆုံးပြီး ၃ ယောက်က ခြေပြတ်လက်ပြတ်ဖြစ်ကာ အများအပြား ဒဏ်ရာရခဲ့တယ်လို့ ဆိုပါတယ်။

ရေစကြိုမြို့နယ် ရေလယ်ကျွန်းဒေသမှာလည်း  ဧပြီ ၁ ရက်မနက်က ရိက္ခာသယ်ပြီး ပြန်လာတဲ့ စစ်ကောင်စီတပ်သားတွေတိုက်ခိုက်ခံရပြီး ၅ ယောက်သေဆုံးကာ PDF ရဲဘော် ၁ ယောက်ကျဆုံးပြီး ၁ ယောက်ဒဏ်ရာရရှိခဲ့တယ်လို့ ပခုက္ကူခရိုင် အမှတ်(၁၀)တပ်ရင်း၊တပ်ခွဲ(၂) သွေးသောက်တော်လှန်ရေးတပ်ဖွဲ့ကနေ သိရပါတယ်။

မင်းရွာပျူစခန်းကနေ မြင်းခြံမြို့နယ် ပတ္တာရွာမှာ ရိက္ခာထောက်ပို့ပစ္စည်းတွေယူပြီး ပြန်လာတဲ့ ခလရ ၂၅၈ က စစ်ကောင်စီတပ်သား၊ ရဲနဲ့ ပျူစောထီးအင်အား ၃၀ လောက်ကို ဧပြီ ၁ ရက် မနက် ၉ နာရီ မိနစ် ၅၀ ကနေ ၁ နာရီခွဲအထိ ဒေသကာကွယ်ရေးပူးပေါင်းတပ်ဖွဲ့တွေက နေရင်းရွာအရှေ့ဘက်နားမှာ ခြုံခိုတိုက်ခိုက်ခဲ့တာလို့ သွေးသောက်တော်လှန်ရေးတပ်ဖွဲ့ရဲ့ တာဝန်ခံ ဗိုလ်ပန်က ပြောပါတယ်။

“တိုက်ပွဲအတွင်းမှာ RPG 7 Error ဖြစ်ပြီး ကျနော်တို့ဘက်က ရဲဘော်တယောက် တိုင်းပြည်အတွက် အသက်ပေးလှူခဲ့ကာ၊။ ရဲဘော် ၁ ယောက် ဒဏ်ရာအနည်းငယ်ရရှိခဲ့တယ်။”

အဲဒီတိုက်ခိုက်မှုမှာ စစ်ကောင်စီဘက်ကလည်း ၅ ယောက်သေဆုံးပြီး အများအပြား ဒဏ်ရာတယ်လို့ဆိုပြောပါတယ်။

မကွေးတိုင်း၊ ဆောမြို့နယ် ကျောက်ထုဒေသမှာလည်း မတ်လ ၃၀ ရက် နေ့လယ်က စစ်ကောင်စီစစ်ကြောင်းတိုက်ခိုက်ခံရပြီး ၃၀ ယောက်ထက်မနည်းသေဆုံးကာ စစ်ကောင်စီဘက်က လေကြောင်းတိုက်ခိုက်ခဲ့တယ်လို့ ဂန့်ဂေါခရိုင် အမှတ် (၈၊၉) တပ်ရင်း PDF-ကျောက်ထုက ဧပြီလ ၁ ရက်မှာ ထုတ်ပြန်ပါတယ်။

ကျောက်ထုဒေသ စံကျေးရွာဘက်ကို စစ်ကြောင်းထိုးလာတဲ့ စစ်ကောင်စီရဲ့ တပ်မ ၇၇ နဲ့ ၁၀၁ က စစ်ကောင်စီတပ်သား အင်အား ၁၅၅ ယောက်လောက်ပါတဲ့စစ်ကြောင်းကို မတ်လ ၃၀ ရက် နေ့လယ် ၁၂ နာရီ ၂၅ မိနစ်မှာ ဒေသကာကွယ်ရေးပူးပေါင်းတပ်ဖွဲ့တွေက စံကျေးရွာနားက တောင်ပျောက်ကုန်းမှာ လက်နက်ကြီးလက်နက်ငယ်တွေနဲ့ တိုက်ခိုက်ခဲ့ကြတာလို့ PDF-ကျောက်ထုရဲ ပြန်ကြားရေးတာဝန်ခံ ဗိုလ်ရန်ကင်းက ပြောပါတယ်။

၂ နာရီလောက် အပြင်းထန်တိုက်ပွဲဖြစ်ပြီး ကျောက်ထုအမြာက်တပ်ကလည်း ၁၂၀ မမ လက်နက်ကြီးတွေနဲ့ တရစပ်ပစ်ခတ်သလို ညနေ ၃ နာရီ ၄၅ မိနစ်ကနေ ၄ နာရီ ၁၀ မိနစ်အထိ Mi 35 တိုက်ခိုက်ရေး ရဟတ်ယာဥ်နဲ့ လေကြောင်းကနေ ၄ ကြိမ်ထက်မနည်း ဗုံးကြဲတိုက်ခိုက်ကာ အထိနာသွားတဲ့ စစ်ကောင်စီတပ်သားတွေကတော့ စံကျေးရွာဘက်ကို ပြန်ဆုတ်သွားကြပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ၃၀ ယောက်ထက်မနည်း သေဆုံးပြီး အများအပြား ဒဏ်ရာရရှိကာ ညနေ ၆ နာရီ ၄၅ မိနစ်မှာ စံကျေးရွာနားက စစ်ဘေးရှောင် စခန်းတွေကို မီးရှို့ဖျက်ဆီးပြီး စစ်ကောင်စီအလောင်းတွေကို လက်စဖျောက်ခဲ့ကြတယ်လို့ ဗိုလ်ရန်ကင်းက ပြောပါတယ်။

အဲဒီတိုက်ခိုက်မှုကို YDF၊CDF-မင်းတပ်တို့နဲ့ အတူပူးပေါင်းတိုက်ခိုက်ခဲ့တာဖြစ်ပြီး PDF ရဲဘော်တချို့ အသေစားထိခိုက်ဒဏ်ရာရရှိခဲ့ပေမဲ့ ဒဏ်ရာအခြေနေက မစိုးရိမ်ရဘူးလို့ ဆိုပါတယ်။

အဆိုပါတိုက်ပွဲတွေအတွင် စစ်ကောင်စီဘက်က ထိခိုက်သေဆုံးတဲ့အခြေနေကို သီးခြားအ အတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်တာ မတွေ့ရသေးပါဘူး။