ဧရာဝတီတိုင်း၊ ဟင်္သာတခရိုင်၊ လေးမျက်နှာမြို့နယ်မှာ ဧည့်စာရင်းစစ်ဆေးခံရပြီး ဖမ်းဆီးခဲ့ရတဲ့ အရပ်သားတွေထဲက လူငယ် ၂ ယောက် စစ်မှုထမ်းထဲ ထည့်ခံခဲ့ရတယ်လို့ ဒေသခံတွေဆီက သိရပါတယ်။
မတ်လ ပထမအပတ်က ဧည့်စာရင်းမတိုင်တာကြောင့်ဆိုပြီး စစ်ကောင်စီတပ်နဲ့ အုပ်ချုပ်ရေးအဖွဲ့တွေရဲ့ ဖမ်းဆီးတာခံခဲ့ရတဲ့ လေးမျက်နှာမြို့နယ်၊ ကျားကိုက်ကျေးရွာက အရပ်သား လူငယ် ၂ ယောက်ကို မတ်လတတိယအပတ်ထဲမှာ စစ်မှုထမ်းထဲ ထည့်လိုက်တာလို့ သိရပါတယ်။
ဖြစ်စဉ်ကိုသိရှိတဲ့ ဒေသခံအရပ်သားတယောက်က “ကချင်ပြည်နယ်ဘက်ကနေ အလုပ်ကနေ မိသားစုတွေရှိတဲ့ လေးမျက်နှာမြို့နယ်ကို ပြန်လာချိန် အဖမ်းခံရတာ။ ဧည့်စိမ်းဖြစ်တယ်၊ ဧည့်စာရင်းမတိုင်သူတွေဆိုပြီး ဖမ်းခဲ့တာ။ စစ်မှုထမ်းထဲ ထည့်ခံရတာက သွားစုံစမ်းလို့ သိရတာ” လို့ ပြောပါတယ်။
အရပ်သား လူငယ် ၂ ယောက် စစ်မှုထမ်းထဲ အထည့်ခံရတဲ့အကြောင်းကို မိသားစုတွေက ဧပြီ ၂ ရက်မှာ စုံစမ်းလို့သိရတာဖြစ်ပြီး ဟင်္သာတအခြေစိုက် ခလရ ၁၈ တပ်ရင်းကနေတဆင့် စစ်မှုထမ်းဖို့ ထည့်ခံရတာ လို့ဆိုပါတယ်။
စစ်မှုထမ်းထဲ ထည့်ခံရတဲ့ လူငယ် ၂ ယောက်ဟာ အသက် ၂၁ နှစ်အရွယ် ကိုလင်းလင်းနဲ့ အသက် ၂၅ နှစ်အရွယ် ကိုမြင့်မောင် ဆိုသူတို့ဖြစ်ပြီး ကချင်ပြည်နယ်၊ ဖားကန့်မြို့နယ်ဘက်မှာ အလုပ်လုပ်ရာကနေ လေးမျက်နှာမြို့နယ်ကို ပြန်လာချိန် အဖမ်းခံရတာ ဖြစ်ပါတယ်။
စစ်ကောင်စီတပ်နဲ့နီးစပ်သူက ဧည့်စာရင်းကိစ္စနဲ့ အဖမ်းခံရတဲ့ အရပ်သား ၂ ယောက် စစ်မှုထမ်းထဲ ထည့်ခံရတာ မှန်ကန်ပြီး ဘယ်စစ်ထမ်းသင်တန်းကျောင်းကို ပို့လိုက်တယ်ဆိုတာ မသိရသေးဘူးလို့ ဆိုပါတယ်။
