သြဂုတ်လပထမပတ်ထဲမှာ ပြည်သူ့ကာကွယ်ရေးတပ်တွေနဲ့ တိုက်ပွဲတွေကြောင့် အကြမ်းဖက်စစ်ကောင်စီတပ်သား အနည်းဆုံး ၉ ယောက်သေဆုံးခဲ့တယ်လို့ ကရင်နီအမျိုးသားများ ကာကွယ်ရေးတပ် (KNDF) က သတင်းထုတ်ပြန်ပါတယ်။
အကြမ်းဖက်စစ်ကောင်စီတပ်တွေဟာ ဇူလိုင်လကုန်ပိုင်းကစပြီး ဒီးမော့ဆိုမြို့နယ် စံပြ ၆ မိုင်ဘက်ကို အင်အားအလုံးအရင်းနဲ့စစ်ကြောင်း ၂ ကြောင်းသုံး ထိုးစစ်ဆင်နေပြီး ဒီးမော့ဆို၊ ဖရူဆိုမြို့နားက ရွာတွေကို လက်နက်ကြီးတွေနဲ့ တိုက်ခိုက်နေတယ်လို့ ဆိုပါတယ်။
သြဂုတ် ၁ ရက်နေ့ မနက်ပိုင်းမှာ ဒီးမော့ဆိုမြို့နယ်၊ သေးဆူလဲရွာထဲမှာ တပ်စွဲထားတဲ့ အကြမ်းဖက် စစ်ကောင်စီတပ်တွေနဲ့ နယ်မြေလုံခြုံရေးယူနေတဲ့ ကရင်နီတပ်မတော် (KA)၊ KNDF တို့ ထိတွေ့တိုက်ပွဲဖြစ်ခဲ့ပါတယ်။
ဖယ်ခုံမြို့နယ် ခေါင်းအိကျေးရွာအုပ်စု၊ ပင်ပုံနဲ့ လွယ်ဝှဲကျေးရွာနားက တောင်ပေါ်မှာ စခန်းချနေတဲ့ စစ်ကောင်စီတပ်တွေကို KNDF B03၊ B11, SSRY နဲ့ ကရင်နီတပ်မတော် (KA)တို့က ချုံခိုတိုက်ခိုက်ခဲ့လို့စစ်ကောင်စီတပ်သား ၂ ယောက် သေဆုံးခဲ့တယ်လို့ ဆိုပါတယ်။
သြဂုတ် ၂ ရက်နေ့ မနက် အစောပိုင်းမှာလည်း ဒီးမော့ဆိုမြို့ ငွေတောင် အခြေစိုက် ခမရ ၄၂၇ တပ်စခန်းကနေ စံပြ ၆ မိုင်ဘက်ကို စစ်ကြောင်းထိုးလာတဲ့ အကြမ်းဖက်စစ်ကောင်စီတပ်တွေနဲ့ KNDF B09 တို့ ထိတွေ့တိုက်ပွဲ တနေကုန်နီးပါးဖြစ်ခဲ့ပြီး ဘောလခဲမြို့နယ် မက်စလောင်းတောင်ပေါ်က စစ်ကောင်စီတပ်စခန်းကို ကရင်နီတပ်မတော် (KA) နဲ့ KNDF B16 တို့က ပြောက်ကျားတိုက်ခိုက်ခဲ့လို့ စစ်ကောင်စီတပ်သား ၁ ယောက် သေဆုံးခဲ့ပါတယ်။
ဒါ့အပြင် သြဂုတ် ၂ ရက်နေ့ မနက်အစောပိုင်းက လွိုင်ကာ်မြို့အခြေစိုက် ခမရ ၂၆၁ တပ်စခန်းရဲ့ ကင်းပုန်းစခန်းနဲ့ လွိုင်ကော်မြို့နယ် ၃ မိုင် လွယ်တမူကျေးရွာထဲကို ဝင်ရောက်လာတဲ့ စစ်ကောင်စီတပ်သား ၄ ယောက်ကို KNDF B12 က တိုက်ခိုက်ခဲ့လို့ အကြမ်းဖက်စစ်ကောင်စီတပ်ဘက်က ထိခိုက်တာတွေ ရှိခဲ့တယ်လို့လည်း ထုတ်ပြန်ပါတယ်။
သြဂုတ် ၅ ရက်နေ့ကလည်း ဒီးမော့ဆိုမြို့နယ် စံပြ ၆ မိုင်နဲ့ ဘက်တလိန်ကျေးရွာတို့မှာ စစ်ကြောင်း ၂ ကြောင်းနဲ့ စစ်ကြောင်းထိုးလာတဲ့ အကြမ်းဖက်စစ်ကောင်စီတပ်တွေကို KNDF B09 နဲ့ DMO PDF တို့က ခုခံတိုက်ခိုက်ခဲ့ပြီး အကြမ်းဖက်စစ်ကောင်စီတပ်သား ၁ ယောက် သေဆုံး၊ ၄ ယောက် ဒဏ်ရာရခဲ့တယ်လို့ ဆိုပါတယ်။
သြဂုတ် ၆ ရက်နဲ့ ၇ ရက်နေ့တို့မှာ စံပြ ၆ မိုင် နဲ့ ဘက်တလိန်ကျေးရွာတို့မှာ စစ်ကြောင်းထိုး လှုပ်ရှားနေတဲ့ စစ်ကောင်စီတပ်တွေကို ကရင်နီတပ်မတော် (KA)၊ KNDF B09 နဲ့ DMO PDF တို့က အပြင်းအထန်ခုခံတိုက်ခိုက်ခဲ့လို့ စစ်ကောင်စီဘက်က အများအပြား ထိခိုက်သေဆုံးခဲ့ပြီး စစ်ကောင်စီတပ်ဟာ သေဆုံးသွားတဲ့ သူတို့တပ်ဖွဲ့ဝင်တွေကို ဘက်တလိန်ကျေးရွာက အိမ်တလုံးထဲထည့်ပြီး မီးရှို့ခဲ့တယ်လို့ ဆိုပါတယ်။
သြဂုတ် ၆ ရက်နေ့မှာပဲ ဒီးမော့ဆိုမြို့မရဲစခန်းကို KNDF B10 က အလစ်အငိုက်တိုက်ခိုက်ခဲ့လို့ စစ်ကောင်စီတပ်သား ၁ ယောက် သေဆုံးခဲ့တယ်လို့ ထုတ်ပြန်ထားပါတယ်။
