မြန်မာနယ်စပ် အိန္ဒိယနိုင်ငံ မဏိပူရပြည်နယ် မိုးရေးမြို့မှာ အရေးပေါ်အခြေအနေ ကြေညာထားတာကို ဇူလိုင် ၉ ရက်မှာ ပြန်ရုပ်သိမ်းလိုက်ကြောင်း ခရိုင်အုပ်ချူပ်ရေးမှူးက ထုတ်ပြန်ပါတယ်။
စစ်ကိုင်းတိုင်း၊ တမူးမြို့ကို အလည်လာတဲ့ အိန္ဒိယနိုင်ငံသား တမီးလ် လူငယ် အမျိုးသား နှစ်ယောက် အသတ်ခံရတာနဲ့ ပတ်သက်လို့ မိုးရေးမြို့မှာ ဒေသခံ အိန္ဒိယနိုင်ငံသားတွေက မကျေမနပ် ဆန္ဒပြခဲ့ကြတာကြောင့် ဇူလိုင် ၆ ရက်မှာ အရေးပေါ်အခြေအနေ ထုတ်ပြန်ခဲ့တာဖြစ်ပါတယ်။
အရေးကြီးကိစ္စမရှိဘဲ အိန္ဒိယပြည်သူတွေ မြန်မာပြည်ဘက်ကို မသွားကြဖို့၊ မဖြစ်မနေသွားမယ်ဆိုပါက သက်ဆိုင်ရာခွင့်ပြုချက်ကိုရယူပြီးမှသာ သွားလာကြဖို့၊ မြန်မာနိုင်ငံသားတွေကိုလည်း ခွင့်ပြုချက်မရှိဘဲ ဝင်ထွက်သွားလာတာမလုပ်ဖို့၊ လူ ငါးယောက်ထက်ပိုမစုဖို့ စတာတွေ အမိန့် ထုတ်ပြန်ထားတာ ဖြစ်ပါတယ်။
ဇူလိုင် ၇ ရက် ကလည်း အိန္ဒိယနိုင်ငံရဲ့ အထူးကွန်မန်ဒိုတပ်ဖွဲ့တွေ အိန္ဒိယ-မြန်မာနယ်စပ် မိုးရေးမြို့လုံခြုံရေးဆောင်ရွက်ဖို့ ရောက်ရှိလာခဲ့ပါတယ်။
အခုလိုအရေးပေါ်အခြေအနေ ပြန်ရုပ်သိမ်းလိုက်လို့ ဝမ်းသာတဲ့အကြောင်း၊ တနိုင်ငံနဲ့ တနိုင်ငံ ကူးလူးဆက်သွယ်ရတာလွယ်ကူကြောင်း၊ ကုန်စည်စီးဆင်းမှုအတွက် အဆင်ပြေကြောင်း နယ်စပ်ဒေသ တမူးမြို့မှာနေထိုင်သူတွေက ပြောပါတယ်။
ဇူလိုင် ၈ ရက်ညပိုင်းမှာတော့ တမူးမြို့၊ မြို့မ (၁၂/က) ရပ်ကွက်၊ နန်းဖာလုံက ကြံ့ခိုင်ရေးပါတီဝင် ရာအိမ်မှူး ဦးအောင်ဆွေ (အသက် ၅၀ ဝန်းကျင်) ပစ်သတ်ခံခဲ့ရတယ်လို့ မြို့ခံတွေထံက သိရပါတယ်။
“ည၁၀နာရီလောက်မှာ အသံကြားလိုက်ရတာ။ သူကကြံ့ခိုင်ရေးပါတီဝင်ပါ။ သူကရာအိမ်မှူး လုပ်ပါတယ်။ သူ ကဒီနောက်ပိုင်းမှာ စစ်ကောင်စီနဲ့ပေါင်းတယ်။ စစ်တပ်သတင်းပေး လည်းလုပ်တယ်။ သူ့အိမ်ကို စစ်သားတွေအဝင်အထွက်လည်းရှိတယ်။ပစ်သတ်ခံရတဲ့နေရာက သူတို့အိမ်ထဲမှာပါ။” လို့ပြောပါတယ်။
ဦးအောင်ဆွေ ပစ်ခတ်သတ်ခံရမှုနဲ့ပတ်သက်ပြီး စစ်ကောင်စီကလည်း သတင်းထုတ်ပြန်ထားပြီး ဇူလိုင် ၉ ရက် မနက် ၇ နာရီခွဲလောက်က နေအိမ်မှာရှိနေစဉ် PDF အဖွဲ့က လာရောက်ပစ်ခတ်ခဲ့တာလို့ စွပ်စွဲဖော်ပြထားပေမဲ့ ဒီဗွီဘီအနေနဲ့ သီးခြားအတည်မပြုနိုင်သေးပါဘူး။
ဇူလိုင် ၅ ရက်နေ့က တမီးလ်လူငယ် နှစ်ယောက်အသတ်ခံရဟာ စစ်ကောင်စီလက်အောက်ခံ ပျူစောထီး တပ်ဖွဲ့ဝင် ဖိုးစိန်နဲ့ ဇော်ရဲတို့ရဲ့လက်ချက်ဖြစ်တယ်လို့ ဒေသခံ PDF တွေနဲ့ NUG အစိုးရက ကြေညာထားသလို အိန္ဒိယသတင်းဌာနတွေလည်း ထုတ်ဖော်ကြေညာထားပေမဲ့ စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကတော့ PDF တွေလက်ချက်လို့ ပြန်လည် စွပ်စွဲထားပါတယ်။
