အမေရိကန်အခြေစိုက် အမျိုးသားဒီမိုကရေစီရန်ပုံငွေအဖွဲ့ (NED) က ချီးမြှင့်တဲ့ ၂၀၂၆ ခုနှစ်အတွက် ဒီမိုကရေစီဆုကို လူငယ်တက်ကြွလှုပ်ရှားသူ ကိုနန်းလင်းက ကိုယ်စားတက်ရောက်ရယူသွားမယ်လို့ ဇူလိုင် ၈ ရက်က ထုတ်ပြန်ကြေညာပါတယ်။
NED က ချီးမြှင့်တဲ့ ၂၀၂၆ ခုနှစ်အတွက် ဒီမိုကရေစီဆု (Democracy Award) ကို မြန်မာ့နွေဦးတော်လှန်ရေးမှာ ပါဝင်နေကြတဲ့ ဒီမိုကရေစီအရေး ကွန်ရက်ချိတ်ဆက် လှုပ်ရှားသူများ (Pro-democracy community organizers) ကို ပေးအပ်ခဲ့တာ ဖြစ်ပါတယ်။
ကိုနန်းလင်းနဲ့ သူ့ရဲ့လုပ်ဖော်ကိုင်ဖက်တွေဟာ စစ်အာဏာရှင်ရဲ့ ပြင်းထန်တဲ့ ဖိနှိပ်ချုပ်ချယ်မှုတွေ ကြားထဲကနေ မြန်မာနိုင်ငံမှာ ငြိမ်းချမ်းတဲ့ ပြည်သူလူထုအခြေပြု ဆန္ဒပြပွဲတွေကို နည်းလမ်းပေါင်းစုံနဲ့ အားကောင်းမောင်းသန် ဆက်လက်ရှင်သန်အောင် ဦးဆောင်ကြိုးပမ်းနေကြတယ်လို့ NED က ထုတ်ပြန်ထားပါတယ်။
ဒီဆုနဲ့ပတ်သက်ပြီး ဆုကိုယ်စားတက်ရောက်ရယူမဲ့ လူငယ်တက်ကြွလှုပ်ရှားသူ ကိုနန်းလင်းက "ဒီဆုဟာ ကျနော်တယောက်တည်းအတွက် မဟုတ်ဘဲ စစ်အာဏာရှင်စနစ် ချုပ်ငြိမ်းရေးအတွက် အသက်သွေးချွေး ပေးဆပ်နေကြတဲ့ ပြည်သူတွေအားလုံးနဲ့ ဆိုင်ပါတယ်" လို့ ပြောပါတယ်။
၂၀၂၆ ခုနှစ် ဒီမိုကရေစီဆု ပေးအပ်ပွဲအခမ်းအနားကို လာမဲ့ စက်တင်ဘာလအတွင်း ဂျော့ခ်ျဝါရှင်တန်ရဲ့ သမိုင်းဝင်အမှတ်တရနေရာ "မောင့်ဗာနွန်” မှာ ကျင်းပသွားမယ်လို့ သိရပါတယ်။
