ရှမ်းပြည်နယ်၊ ဖယ်ခုံမြို့နယ်အရှေ့ဘက်ကမ်း ဆီးမီးလော့ကျေးရွာအနီးမှာ မေလ ၁၈ ရက်  ဒီကနေ့မနက် ၇ နာရီကျော်ကစပြီး စစ်ကောင်စီတပ်နဲ့ ကရင်နီအမျိုးသားများ ကာကွယ်ရေးတပ်တို့အကြား တိုက်ပွဲ ဆက်လက်ဖြစ်ပွားနေပါတယ်။

ဖယ်ခုံမြို့အရှေ့ဘက်ကမ်းဒေသဆီ ထိုးစစ်ဆင်လာတဲ့ မိုးဗြဲအခြေစိုက် စစ်ကောင်စီရဲ့  ခမရ-၄၂၂ နဲ့ KNDF-B03 တို့အကြား တိုက်ပွဲဖြစ်ပွားနေတာဖြစ်ပြီး မွန်းလွဲ ၂ နာရီထိ အပြန်အလှန် ပစ်ခတ်နေဆဲပဲလို့ KNDF-B03 တာဝန်ရှိသူတဦးက ပြောပါတယ်။

တိုက်ပွဲအတွင်း လွိုင်ကော်အမြောက်တပ် ခမရ ၄၂၂ တပ်တွင်းကနေပြီး လက်နက်ကြီး အဆက်မပြတ် ပစ်ခတ်နေပါတယ်။

ဒီကနေ့တိုက်ပွဲအတွင်း KNDF-B03 တပ်ခွဲ ၄ မှ ရဲဘော် တယောက်  ကျဆုံးခဲ့ရသလို နောက်တယောက်လည်း  ပြင်းထန်စွာ ဒဏ်ရာရရှိခဲ့ပါတယ်။

မနေ့ မေ ၁၇ ရက်ကလည်း အဆိုပါ ဆီးမီးလော့ကျေးရွာအနီး တိုက်ပွဲတွေ ဖြစ်ပွားခဲ့ပြီး စစ်ကောင်စီဘက်က ၃ ယောက် ကျဆုံးခဲ့ပါတယ်။

အလားတူ ဒီးမော့ဆိုမြို့မဈေးအတွင်းမှာလည်း KNDF BO-19 နဲ့ စစ်ကောင်စီတို့အကြား  မနေ့က တိုက်ပွဲဖြစ်ပွားခဲ့ပြီး တိုက်ပွဲအတွင်း စစ်ကောင်စီတပ်သား ၅ ယောက် ကျဆုံးခဲ့ကြောင်း KNDF BO019 က ထုတ်ပြန်ထားပါတယ်။ ဒါ့အပြင် လက်နက်တချို့လည်း သိမ်းဆည်းရမိခဲ့ပါတယ်။

အခုရက်ပိုင်း ဖြစ်ပွားတဲ့ တိုက်ပွဲကြောင့် ဖယ်ခုံ၊ မိုးဗြဲမြို့တွေက ကျေးရွာပေါင်း ၃၅ ရွာက ဒေသခံတွေ ထွက်ပြေးတိမ်းရှောင်နေကြရပြီး ဆောင်နန်းခဲကျေးရွာလည်း မီးရှို့ဖျက်ဆီးခံခဲ့ရပါတယ်။