ချင်းပြည်နယ်၊ ဖလမ်းမြို့နယ်မှာ မေလ ပထမအပတ်အတွင်း ဖြစ်ပွားခဲ့တဲ့ တိုက်ပွဲတွေမှာ စစ်ကောင်စီဘက်က ၂၆ ယောက်သေဆုံးပြီး အများအပြားဒဏ်ရာရရှိကာ ချင်းကာကွယ်ရေးတပ် CDF ဘက်က ၉ ယောက် ကျဆုံးခဲ့တယ်လို့ ချင်းအမျိုးသားအဖွဲ့ချုပ် CNO/CNDF က မေလ ၁၀ ရက်နေ့ ရက်စွဲနဲ့ ထုတ်ပြန်ပါတယ်။
ဖလမ်းမြို့ကနေ ဟားခါးမြို့ဘက်ကို မေ ၂ ရက်နေ့က ထွက်ခွာလာတဲ့ စစ်ကောင်စီတပ်သား အင်အား ၁၇၀ လောက်ပါတဲ့ သံချပ်ကာ ကား ၂ စီးနဲ့ စစ်ကောင်စီယာဥ်တန်း အစီး ၂၀ ကျော်ကို မေလ ၄ ရက်နဲ့ ၅ ရက်နေ့တွေမှာ ဒေသကာကွယ်ရေးပူးပေါင်းတပ်ဖွဲ့တွေက မိုင်တိုင် ၂၀ နဲ့ ၂၆ တွေမှာ ချုံခိုတိုက်ခိုက်တာတွေ၊ မိုင်းဆွဲတိုက်ခိုက်တာတွေ ပြုလုပ်ခဲ့တာကြောင့် စစ်ကောင်စီတပ်သား ၁၈ ယောက် သေဆုံးကာ အများအပြားဒဏ်ရာရရှိခဲ့တယ်လို့ CNDF ရဲ့ ပြန်ကြားရေးတာဝန်ခံက ပြောပါတယ်။
အဲဒီတိုက်ပွဲမှာ ချင်းပြည်သူ့ကာကွယ်ရေး ပူးပေါင်းတပ်ဖွဲ့ဘက်က သူရဲကောင်း ၈ ယောက် တိုင်းပြည်နဲ့ လူမျိုးအတွက် အသက်ပေးလှူလိုက်ရတယ်လို့ ဆိုပါတယ်။
အဲဒီရက်တွေမှာပဲ စစ်ကောင်စီတပ်သားတွေဟာ ရမ်ထလိုကျေးရွာက ပြည်သူတွေရဲ့ နေအိမ် ၁၀ လုံးနဲ့ တလန်ဇာ ကျေးရွာက နေအိမ် ၁၇ လုံးကို မီးရှို့ဖျက်ဆီးခဲ့ကြတယ်လို့ ပြန်ကြားရေးတာဝန်ခံက ပြောပါတယ်။
ဖလမ်း-ဟားခါးလမ်း ၁၆ မိုင်အကျော်မှာလည်း မေ ၆ ရက်နေ့က စစ်ကောင်စီယာဥ်တန်းကို CNDF က မိုင်းပဒေသာဆွဲပြီးတိုက်ခိုက်ရာ စစ်ကောင်စီတပ်သား ၈ ယောက် သေဆုံးကာ အများအပြား ဒဏ်ရာရရှိခဲ့တယ်လို့ ဆိုပါတယ်။
နှစ်ဘက်တိုက်ပွဲအတွင်းမှာ စစ်ကောင်စီတပ်သား ၂၆ ယောက်သေဆုံးတယ်လို့ CNDF ရဲ ပြန်ကြားရေးတာဝန်ခံက ပြောဆိုထားပေမယ့် ဒီဗွီဘီက သီးခြားအတည်မပြုနိုင်သေးပါဘူး။
စစ်ကောင်စီတပ်တွေဟာ အနောက်မြောက် စစ်ဒေသဖြစ်တဲ့ ချင်းပြည်နယ်၊ စစ်ကိုင်းတိုင်းနဲ့ မကွေးတိုင်းတွေကို ထိန်းချုပ်ဖို့ ခက်ခဲလာတာကြောင့် စစ်အင်အားအလုံးအရင်းနဲ့ ထိုးစစ်ဆင်တာတွေပြုလုပ်ပြီး နေအိမ်တွေကို မီးရှို့ဖျက်ဆီးတာကြောင့် လူဦးရေ ၃ သိန်းကျော် နေရပ်စွန့်ခွာ ထွက်ပြေးနေကြရတယ်လို့ United Nations OCHA Myanmar ရဲ့ ထုတ်ပြန်ချက်အရ သိရပါတယ်။
နှစ်ဘက်တိုက်ပွဲတွေနဲ့ ပတ်သက်လို့တော့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာ မတွေ့ရသေးပါဘူး။
