မွန်ပြည်သစ်ပါတီက ဦးဆောင်ကျင်းပမယ့် မွန်အမျိုးသားကွန်ဖရင့်ကို မွန်ပြည်သစ်ထိန်းချုပ်နယ်မြေ ရေးချောင်းဖျားဒေသရှိ မွန်အမျိုးသားပညာရေးဌာနဗဟို ညီစားစခန်းမှာ ကျင်းပသွားမယ်လို့ မွန်ပြည်သစ်ပါတီ ဗဟိုအလုပ်အမှုဆောင်အဖွဲ့ဝင် နိုင်ဗညားလယ်က ပြောပါတယ်။
မွန်အမျိုးသားကွန်ဖရင့်ကို လာမယ့် မေလ ၂ ရက်မှ ၅ ရက်အထိ ၄ ရက် ကျင်းပသွားဖို့ စီစဉ်ထားပြီး အဲဒီကွန်ဖရင့်မှာ ဖက်ဒရယ်ပြည်ထောင်စုအခြေခံမူနဲ့ မွန်ပြည်နယ် ဖွဲ့စည်းပုံအခြေခံဥပဒေ တစ်ရပ် ရေးဆွဲသွားဖို့ ရှိနေတာပါ။
ဒါ့အပြင် ကွန်ဖရင့်မှာတော့ မွန်အမျိုးသားရေးရာတွေအပြင် သက်ဆိုင်ရာကဏ္ဍအလိုက် မူဝါဒတွေကိုလည်း ထည့်သွင်ဆွေးနွေးသွားဖို့ စီစဉ်ထားတယ်လို့ မွန်ပြည်သစ်ပါတီက မွန်ဘာသာနဲ့ ထုတ်ပြန်တဲ့ အင်တာဗျူးအစီအစဉ်မှာ နိုင်ဗညားလယ်က ပြောဆိုခဲ့တာပါ။
မွန်အမျိုးသားကွန်ဖရင့်ကိုတော့ မွန်ပြည်သစ်ပါတီ အယောက် ၃၀ ၊ မွန်ညီညွတ်ရေးပါတီ အယောက် ၃၀ ၊ အရပ်ဖက် မွန်အဖွဲ့အစည်းတွေ ၄၅ ယောက်၊ မွန်သံဃာတော် ၃၀ ပါး၊ တခြားပညာရှင်တွေ အပါအဝင် စုစုပေါင်း အယောက် ၂၅၀ ကျော်ကို တက်ရောက်ဖို့ ဖိတ်ကြားထားတာပါ။
ပြီးခဲ့တဲ့ ၂၀၁၆ ခုနှစ်က ကျင်းပခဲ့တဲ့ မွန်အမျိုးသားကွန်ဖရင့်ကိုတော့ မွန်ပြည်သစ်ပါတီထိန်းချုပ်နယ်မြေ ကရင်ပြည်နယ် ကြာအင်းဆိပ်ကြီးမြို့နယ် ပေါလောကုန်းကျေးရွာမှာ ကျင်းပခဲ့ပါတယ်။
