တနင်္သာရီတိုင်း ပုလောမြို့မှာရှိတဲ့ မြို့နယ် အထွေထွေအုပ်ချုပ်ရေးဦးစီးဌာ အနီးနားနဲ့ စရဖ ရုံးအနီးနားမှာ ဗုံး ၂ လုံး ပေါက်ကွဲခဲ့ပါတယ်။
ဖေဖော်ဝါရီ ၁၃ ရက်နေ့က ပေါက်ကွဲခဲ့တာဖြစ်ပြီး မြို့နယ်အထွေထွေအုပ်ချုပ်ရေးရုံးအနီးနားမှာ မနက် ၆ နာရီကျော်လောက်က ပထမဗုံး ပေါက်ကွဲခဲ့တာဖြစ်ကာ မနက် ၇ နာရီ ခွဲဝန်းကျင်အချိန်မှာတော့ လယ်ဝိုင်ဘုန်းတော်ကြီးကျောင်းအနီး စရဖ ရုံးဝန်းကျင်မှာ ဒုတိယဗုံးပေါက်ကွဲခဲ့တာလို့ ဒေသခံတွေက ပြောပါတယ်။
ပထမ ပေါက်ကွဲခဲ့တဲ့ဗုံးကြောင့် ထွေအုပ်ရုံးမှာရှိတဲ့ ပြတင်းမှန်တံခါးတွေ ထိခိုက်ပျက်စီး သွားခဲ့ပြီး ထိခိုက်ဒဏ်ရာရရှိသူတော့ မရှိဘူးလို့ သိရပါတယ်။
အဆိုပါ ဗုံးပေါက်ကွဲမှုနဲ့ ပတ်သက်လို့ ပုလောဒေသကာကွယ်ရေးတပ်ဖွဲ့ တာဝန်ရှိသူတစ်ဦးကတော့ သူတို့နဲ့ မသက်ဆိုင်ဘူးလို့ ငြင်းဆိုထားပါတယ်။
ပြီးခဲ့တဲ့ ၂ လလောက်ကလည်း ပုလောမြို့ပေါ်မှာ ဗုံးပေါက်ကွဲမှု ၄ ကြိမ်ခန့် ဖြစ်ပွားခဲ့တယ်လို့ သိရပါတယ်။