ကယားပြည်နယ်မှာ ဒီဇင်ဘာ ၂၄ ရက်က ကလေး ၄ ယောက်နဲ့ လူသားချင်း စာနာထောက်ထားမှုအဖွဲ့အစည်း Save the Children မှ ဝန်ထမ်းနှစ်ယောက် အပါအဝင် လူ ၃၅ ယောက်ထက်မနည်း သေဆုံးခဲ့ရတဲ့ သတ်ဖြတ်မီးရှို့ခံရမှုအပေါ် တုန်လှုပ်ချောက်ချား ဝမ်းနည်းမိပါကြောင်း UNICEF က ထုတ်ပြန်ကြေညာပါတယ်။
ဒီလို လုံးဝလက်မခံနိုင်စရာ အဖြစ်ဆိုးကို စုံစမ်းစစ်ဆေးဖို့နဲ့ တာဝန်ရှိသူတွေကို အရေးတကြီး အရေးယူဖို့ UNICEF က တောင်းဆိုထားပါတယ်။
ခိုင်လုံတဲ့သတင်းတွေအရ အသက် ၁၇ နှစ်အရွယ် ယောက်ျားလေး ၂ ယောက်၊ ဆယ်ကျော်သက် မိန်းကလေး တယောက်နဲ့ အသက် ၅ နှစ်မှ ၆ နှစ်ကြား ကလေးတယောက်တို့ အပါအဝင် တိုက်ခိုက်မှုအတွင်း ကလေး ၄ ယောက် သေဆုံးခဲ့တယ်လို့ အစီရင်ခံတွေမှာ ဖော်ပြပါတယ်။
Save the Children မှ ဝန်ထမ်းနှစ်ယောက်ဟာ ဖရူဆိုမြို့နယ် အနီးနားရှိ အသိုက်အဝန်းမှာ လူသားချင်းစာနာထောက်ထားမှုဆိုင်ရာ လိုအပ်ချက်များကို ဖြည့်ဆည်းဆောင်ရွက်ပေးပြီးနောက် Save the Children - လွိုင်ကော်ရုံးကို ပြန်လာချိန်မှာ သေဆုံးသွားခဲ့ရတာလို့ သိရပါတယ်။
အရပ်သားတွေ၊ ကလေးတွေနဲ့ လူသားချင်းစာနာထောက်ထားမှုဆိုင်ရာ လုပ်သားတွေအပေါ် ဒီလို တိုက်ခိုက်မှုကို UNICEF က ပြင်းပြင်းထန်ထန ရှုတ်ချကြောင်း UNICEF ရဲ့ အရှေ့အာရှနဲ့ ပစိဖိတ်ဒေသဆိုင်ရာ ညွှန်ကြားရေးမှူး မစ္စဒီဘိုရာကိုမီနီက ပြောပါတယ်။
မြန်မာနိုင်ငံက လက်မှတ်ရေးထိုးထားတဲ့ အပြည်ပြည်ဆိုင်ရာ လူသားချင်းစာနာထောက်ထားမှု ဥပဒေနဲ့ ကလေးသူငယ် အခွင့်အရေးများဆိုင်ရာ သဘောတူစာချုပ်အရ ပဋိပက္ခဖြစ်နေချိန်အတွင်း အရပ်သားတွေရဲ့ အကာအကွယ်ကို အထူးသဖြင့် ကလေးသူငယ်တွေနဲ့ လူသားချင်း စာနာထောက်ထားမှုဆိုင်ရာ အလုပ်သမားတွေကို ဦးစားပေးအနေနဲ့ သဘောထားရမယ်လို့ ဆိုပါတယ်။
