ထိုင်း-မြန်မာနယ်စပ် တာ့ခ်ခရိုင် မဲဆောက်မြို့မှာ မြန်မာဘက်ခြမ်းကို တရားမဝင်တင်ပို့မဲ့ စက်သုံးဆီ လီတာပေါင်း ၂၈,၂၀၀ လီတာကို ဖမ်းဆီးရမိတယ်လို့ တာဝန်ရှိသူတွေက ဒီကနေ့ (မေ ၅ ရက်) သတင်းစာရှင်းပွဲမှာ ပြောပါတယ်။ 

မြို့နယ် အကောက်ခွန်ဌာန၊ အုပ်ချုပ်ရေး၊ စစ်တပ်နဲ့ နယ်မြေခံရဲတွေပါတဲ့ ပူးပေါင်းအဖွဲ့ဟာ သောင်ရင်းမြစ်ကမ်းတလျှောက် တရားဥပဒေစိုးမိုးရေး စစ်ဆေးဆောင်ရွက်စဉ် ထာ့ဆိုင်လွတ် ရပ်ကွက်ထဲမှာ မသင်္ကာဖွယ် ဆယ်ဘီးကား ၂ စီးကိုပါ စစ်ဆေးရာက တရားမဝင် စက်သုံးဆီတွေ ဖမ်းဆီးရမိတာလို့  မဲဆောက်အကောက်ခွန်ဦးစီးဌာန တာဝန်ရှိသူ နိုင်းယွက်ဖုန်း ဝိချန်းကွန်းက ပြောပါတယ်။ 

အဆိုပါ ဆယ်ဘီးကား ၂ စီးလုံးပါ မိုးကာတွေနဲ့ အုပ်ထားပြီး ကုန်ပစ္စည်းတွေ တင်ထားသယောင် ရှိတယ်။ သေချာမစစ်ဆေးရင် လောင်စာဆီတင်ကားမှန်း မသိသာဘူး၊ တာဝန်ရှိသူတွေက မိုးကာကို လှပ်ပြီး စစ်ဆေးရာမှာတော့  စက်သုံးဆီ လီတာ ၂၀၀ ဆံ့ ပီပါပုံးပေါင်း ၁၄၁ ပုံးကို တွေ့ရှိတယ်။  အခွန်ဆောင်ထားတဲ့ စာရွက်စာတမ်းတစုံတရာ မရှိဘူး၊ အဲဒီကား ၂ စီးပေါ်ကနေ စက်သုံးဆီစုစုပေါင်း ၂၈, ၂၀၀ လီတာကို သိမ်းဆည်းရမိတာလို့ ဆိုပါတယ်။ 

ထိုင်းနိုင်ငံမှာ စက်သုံးဆီတွေ စတင်ရှားပါးလာတဲ့နောက် ပြည်ပနိုင်ငံကို တင်ပို့ရောင်းချခွင့် ပိတ်ပင်ထားတာမှာ တရားမဝင်တင်ပို့မှုတွေ ရှိနေပြီး ဒီ ၂၀၂၆ ခုနှစ် မတ် ၆ ရက်မှ ဒီနေ့ထိ အရေးယူခဲ့တဲ့ အမှုပေါင်း ၁၉ မှု ရှိပါတယ်။ 

အဲဒီကနေ စုစုပေါင်းတန်ဖိုး ၃,၆၉၇,၆၂၈ ဒသမ ၈၅ ဘတ် ရှိ စက်သုံးဆီ ၉၄,၅၉၅ လီတာ သိမ်းဆည်းရမိကာ အကောက်ခွန်ဌာနက ဒဏ်ငွေ ဘတ် ၃,၂၉၆,၅၂၈ ချမှတ်ခဲ့တယ်လို့  အကောက်ခွန်အရာရှိ နိုင်းယွက်ဖုန်းက ပြောပါတယ်။ 

Source -  AEC อาเซียน News