ရှမ်းပြည်နယ်အရှေ့ပိုင်း၊ အထူးဒေသ-၄ မိုင်းလားမြို့အတွင်း ကျန်းမာရေးထောက်ခံချက်မရှိဘဲ နေထိုင်ပါက ဒဏ်ငွေဆောင်ရမယ်လို့ ထုတ်ပြန်ထားပါတယ်။

ကိုဗစ်-၁၉ ရောဂါပိုး ကူးစက်ပြန့်ပွားမှုကို ထိထိရောက်ရောက် ကာကွယ်တားဆီးနိုင်ဖို့အတွက် မြို့တွင်းနေထိုင်သူတွေအနေနဲ့ မိမိ ငှားရမ်းထားတဲ့ အခန်းကနေ အခန်းပြောင်းရွှေ့နေထိုင်မယ်၊ ဟိုတယ်နဲ့ တည်းခိုခန်း‌တွေမှာ တည်းခိုမယ်ဆိုပါက အထူးဒေသ-၄ ကျန်းမာရေးကတ်ပြားနဲ့ သက်ဆိုင်ရာ နယ်မြေအလိုက် အုပ်ချုပ်ရေးရုံး‌တွေမှာ ထောက်ခံစာသွားရောက်ထုတ်ယူရမှာ ဖြစ်ပါတယ်။

အဲဒီလို သက်ဆိုင်ရာ အုပ်ချုပ်ရေးရုံးရဲ့ ထောက်ခံစာမပါဘဲ နေထိုင်တာကို စစ်ဆေးတွေ့ရှိပါက ဒဏ်ငွေပေးဆောင်ရမယ်လို့ ဩဂုတ် ၁၅ ရက်နေ့မှာ မိုင်းလားအဖွဲ့က အသိပေးထားတာပါ။

မိုင်းလားမြို့ဟာ မြန်မာ-တရုတ် နယ်စပ်မြို့တမြို့ ဖြစ်ပြီး ကာစီနို၊ လောင်းကစား၊ မူးယစ်ဆေးဝါး၊ ဇိမ်ခန်း၊ ပြည့်တန်ဆာ၊ သားရိုင်းတိရစ္ဆာန်ထွက်ပစ္စည်း ရောင်းဝယ်ရေးလုပ်ငန်း၊ ခရီးသွားလုပ်ငန်းတွေနဲ့ လူသိများ ကျော်ကြားပါတယ်။

လက်ရှိ ကိုဗစ်-၁၉ ရောဂါကပ်ဆိုးကြောင့် တရုတ်နိုင်ငံသားတွေကို မြန်မာနိုင်ငံထဲကနေ ပြန်လည်ခေါ်ယူထားပြီး ပြည်ပထွက်ခွင့်လည်း ပိတ်ပင်ထားတာကြောင့် မိုင်းလားမြို့မှာ စီးပွားရေး သိသိသာသာ ကျဆင်းနေတယ်လို့ ဒေသခံတွေက ပြောပါတယ်။

ရှမ်းပြည်နယ်အရှေ့ပိုင်း၊ အထူးဒေသ-၄ နယ်မြေကို စစ်တပ်နဲ့ ငြိမ်းချမ်းရေးယူထားတဲ့  အမျိုးသားဒီမိုကရက်တစ်မဟာမိတ်တပ်မတော် (NDAA) က ထိန်းချုပ်ထားပါတယ်။