ဧရာဝတီတိုင်းဒေသကြီး ဘိုကလေးမြို့မှာ သြဂုတ် ၁၄ ရက်က ကိုဗစ်-၁၉ ကာကွယ်ရေးထိန်းချုပ်ရေး စည်းကမ်းမလိုက်နာလို့ဆိုပြီး စစ်ကောင်စီတပ်ဖွဲ့ဝင်တွေက မြို့တွင်း သွားလာနေသူ ၁၀ ဦးထက် မနည်း ဖမ်းဆီးခဲ့တယ်လို့ ဒေသခံတွေက ပြောပါတယ်။
ဘိုကလေးမြို့မှာ မနက် ၄ နာရီကနေ မနက် ၁၀ နာရီထိသာ အိမ်ပြင်ပ သွားလာခွင့်ပြုပြီး ဒီနေ့မှာတော့ ဆိုင်ကယ်နဲ့ သွားလာနေသူတွေကို ဖမ်းဆီးခဲ့တာပါ။
ဒေသခံ အမျိုးသားတစ်ဦးက “မနက်က စျေးထဲမှာ အချုပ်ကားထိုးပြီး ဖမ်းတယ်၊ ၁၀ယောက်လောက် ပါသွားတယ်။ နောက်ပြီး ၁၂ လမ်းထိပ်မှာလည်း ၆ ယောက်လောက် ပါသွားတယ်” လို့ ပြောပါတယ်။
ဘိုကလေးမြို့အတွင်း လူစည်ကားရာ နေရာတွေဖြစ်တဲ့ မြို့မစျေးအနီး ဘောလုံးကွင်း စူပါဘွိုင်းထောင့်နဲ့ တတိယလမ်းတွ်မှာ မနေ့ကစတင်ပြီး အချုပ်ကားနဲ့ ဖမ်းဆီးမှုများပြုလုပ်ခဲ့တာပါ။
“အချုပ်ကားနဲ့က မနေ့က စဖမ်းတယ်၊ ဆိုင်ကယ်တွေလည်း ကားနဲ့တင်သွားတာ။ မြို့ထဲ နေရာအနှံ့ ဖမ်းတယ်၊ ၁၂ နာရီမထိုးခင်လေးမှာ လိုက်ဖမ်းတာ ညနေ ၄ နာရီလောက်ဆို မဖမ်းတော့ဘူး။ သွားလာနေကြတာပဲ” လို့ ဒေသခံအမျိုးသမီးတဦးက ပြောပါတယ်။
ဇူလိုင် ၂၁ ရက်နေ့ကစတင်ပြီး မနက် ၄ နာရီမှ မနက် ၁၀ နာရီထိသာ ဆိုင်ကယ်တစ်စီးကို တစ်ဦးသာ စီးနင်းပြီး ထွက်ခွာခြင်းပြုလုပ်ဖို့နဲ့ မလိုက်နာပါက ဆိုင်ကယ်သိမ်းဆည်းမယ့်အပြင် လူကိုပါ ဖမ်းဆီးမယ်လို့ စစ်ကောင်စီက အသိပေးပြောဆိုထားပါတယ်။
ဘိုကလေးမြို့မှာ ဇူလိုင် ၂၁ ရက်နေ့ကစတင်ပြီး မနက် ၄ နာရီကနေ မနက် ၁၀ နာရီအထိသာ နေအိမ်ပြင်ပ ထွက်ခွာခြင်းပြုလုပ်ဖို့ ကိုဗစ-၁၉ ထိန်းချုပ်ရေးနှင့် အရေးပေါ်တုံ့ပြန်ရေးကော်မတီ က ဇူလိုင် ၂၀ ရက် ညပိုင်းက မြို့တွင်းမှာ အသံချဲ့စက်နဲ့ လိုက်လံအသိပေးခဲ့ပါတယ်။
