စစ်ကိုင်းတိုင်း၊ ရေဦးမြို့မှာ ဇူလိုင် ၂၃ ရက်နေ့ မနက်ပိုင်းက နှစ်ပတ်တခါပုံမှန်စစ်ဆေးနေကျ ကျန်းမာရေးဝန်ထမ်းတွေအပါအဝင် လူပေါင်း ၁၃၀ ကို ကိုဗစ်စစ်ဆေးပေးရာ ၆၄ ဦး ကိုဗစ်-၁၉ ရောဂါပိုးတွေ့ရှိခဲ့တယ်လို့ သိရပါတယ် ။
အဆိုပါ ကိုဗစ်ပိုးတွေ့သူ ၆၄ ဦးထဲမှာ ကျန်းမာရေးဝန်ထမ်း ၄ ဦးနဲ့ ဝန်ထမ်းမိသားစု ၄ ဦး ပါဝင်နေလို့ ပြည်သူ့ဆေးရုံကြီးကို ယာယီပိတ်ထားမယ်လို့ သိရပါတယ်။
ပြည်သူ့ဆေးရုံတာဝန်ရှိသူတဦးက “တာဝန်ထမ်းဆောင်နေတဲ့ ကျန်းမာရေးဝန်ထမ်းတွေ ကိုဗစ်ပိုးကူးစက်ခံရတဲ့အတွက် လာမယ့် တနင်္လာနေ့ကစပြီး ရေဦးမြို့ ခုတင် ၁၀၀ ဆေးရုံကြီး ပြင်ပလူနာဌာနရော၊ အရေးပေါ်ဌာနရော ရက်အကန့်အသတ်မရှိ ပိတ်ထားမှာဖြစ်ပြီး ကိုဗစ်အတည်ပြုလူနာတွေကိုပဲ အထူးဂရုစိုက်ကုသပေးသွားမယ်” လို့ ပြောပါတယ်။
ရေဦးမြို့နယ်မှာ ကိုဗစ်-၁၉ တတိယလှိုင်းစတင်ဖြစ်ပွားချိန် ဇွန်လ လယ်ကစပြီး ဇူလိုင်လ ၂၃ ရက်နေ့အထိ ပိုးတွေ့လူနာပေါင်း ၃၁၇ ဦးအနက် ရောဂါသက်သာပျောက်ကင်းဦး ၁၆၂ ဦးနဲ့ သေဆုံးသူ ၆ ဦးရှိတယ်လို့ သိရပါတယ်။
