စစ်ကိုင်းတိုင်း ကလေးဝ၊ ခန္တီးနဲ့ ဟုမ္မလင်းမြို့တို့မှာ ဇွန် ၂၉ ရက်နဲ့ ၃၀ ရက်နေ့တွေက မြို့နယ်တရားသူကြီးနဲ့ မြို့နယ်ရဲမှူးတို့အပါအဝင် ၁၄ ဦးမှာ ကိုဗစ်ပိုးတွေ့ရှိခဲ့တယ်လို့ သိရပါတယ်။
ပရဟိတလုပ်ကိုင်သူတစ်ဦးက “အခုကျနော်တို့ ဟုမ္မလင်းမြို့မှာ မြို့နယ်တရားသူကြီးနဲ့ မြို့နယ်ရဲမှူး ကိုဗစ်ပိုးတွေ့တယ်။ မနေ့က ဟုမ္မလင်းပြည်သူဆေးရုံမှာ RTD Test kits နဲ့စစ်တယ်၊ မြို့နယ်ရဲတပ်ဖွဲ့ရုံးက ရဲ ၅ ယောက် စုစုပေါင်း ၇ ဦး ကိုဗစ်ပိုးတွေ့ရှိတယ်” လို့ ပြောပါတယ်။
ကိုဗစ်ပိုးတွေ့ရှိခဲ့တဲ့ မြို့နယ်ရဲမှူးရဲ့ ကျန်းမာရေးအခြေအနေဆိုးနေပြီး အောက်စီဂျင်သွင်းနေရတယ်လို့ ပြောပါတယ်။
ဟုမ္မလင်းမြို့မှာ ရပ်ကွက် ၃ ရပ်ကွက်ရှိပြီး အဲ့ဒီထဲက နောင်ပုကျစ်ရပ်ကွက်ကို လော့ဒေါင်းချပြီး Stay Home အဖြစ်သတ်မှတ်ထားတယ်လို့ ပြောပါတယ်။
ဟုမ္မလင်းမြို့မှာ ကိုဗစ်ပိုးတွေ့ရှိသူ ဇွန် ၃၀ ရက်နေ့ထိ ၁၇၆ ယောက်ရှိပြီး သေဆုံးသူတော့ မရှိသေးဘူးလို့ သိရပါတယ်။
ကလေးဝမြို့မှာလည်း ဇွန် ၂၉ ရက်နေ့က ကိုဗစ်-၁၉ အတည်ပြုလူနာ ၄ ဦး ထပ်မံ တွေ့ရှိတယ်လို့ ပရဟိတ လုပ်ကိုင်သူတစ်ဦးက ပြောပါတယ်။
“ကျနော်တို့ ကလေးဝမြို့ပြည်သူ့ဆေးရုံကို အနံ့မရလို့ ရောက်ပြသသူ စုစုပေါင်း ၇ ဦးရှိတယ်။ သူတို့ကို RDT Test Kits နဲ့ စစ်ဆေးရာ အမှတ် ၂ ရပ်ကွက်က ၃ ဦး၊ အမှတ် ၃ ရပ်ကွက်မှ ၁ ဦး၊ စုစုပေါင်း ၄ ဦး ကိုဗစ်ပိုးတွေ့ရှိတယ်။”
ကိုဗစ် တတိယလှိုင်းအတွင်း ကလေးဝမြို့နယ်တွင် ဒီနေ့ထိ ပိုးတွေ့လူနာ ၁၀၀ အနက် ၃ ဦးသေဆုံးပြီး ၁၉ ဦး ရောဂါသက်သာလို့ ဆေးရုံဆင်းသွားပြီလို့ ကလေးဝဆေးရုံစရင်းတွေအရ သိရပါတယ်။
ခန္တီးမြို့မှာ ဇွန် ၃၀ ရက်နေ့က ကိုဗစ်-၁၉ အတည်ပြုလူနာ ၃ ဦးတွေ့ရှိခဲ့တယ်လို့ ပရဟိတလုပ်ကိုင်တစ်ဦးက ပြောပါတယ်။
“အခုမနက် ခန္တီးမြို့ ပြည်သူ့ဆေးရုံမှာ ကိုဗစ်လာစစ်ဆေးတယ်။ ခန္တီးခရိုင် ပညာရေးဝန်ထမ်းက ၁ ဦး၊ ဆင်သေကျေးရွာ အုပ်ချုရေးမှူး မိန်းမနဲ့သားကို RDT Test kits နဲ့ စစ်ဆေးတယ်၊ ၃ ယောက်လုံး ကိုဗစ်ပိုးတွေ့ရှိခဲ့တယ်။”
ခန္တီးမြို့မှာ ကိုဗစ်ပိုးတတိလှိုင်းကာလ ပထမဆုံး အတည်ပြုလူနာ ၃ ဦးတွေ့ရှိခဲ့တာလည်း ဖြစ်ပါတယ်။
