တောင်တွင်းကြီးမြို့ အုန်းတော ၁ ရပ်ကွက်မှာနေထိုင်တဲ့ ကိုမျိုးမင်းဦးကို ဇွန်လ ၂၅ ရက်နေ့ ည ၈ နာရီလောက်မှာ အကြမ်းဖက်စစ်တပ်က နေအိမ်ကို လာရောက် ဖမ်းဆီးခေါ်ဆောင်သွားတယ်လို့ သိရပါတယ်။

“မေးစရာရှိလို့ဆိုပြီး အိမ်ကို လာခေါ်သွားတာဘဲ။ ဆိုင်ကယ်နဲ့ ဖုန်းတွေပါ ပါသွားတယ်ပြောတယ်။ အရင်ရက်ပိုင်းကလည်း အဖမ်းခံရပြီး ပြန်လွတ်လာတာ မကြာသေးဘူး'' လို့ မိသားစုနဲ့နီးစပ်သူတစ်ဦးက ပြောပါတယ်။

ကိုမျိုးမင်းဦးနဲ့ ဆွေမျိုးနီးစပ်သူတစ်ဦးက “သူ့ရဲ့ဘယ်ဘက်မျက်လုံးကလည်း ၃ လပိုင်းလောက်က ကြံ့ဖွံ့ကလုပ်တဲ့ တပ်မတော်ထောက်ခံပွဲလုပ်တဲ့သူတွေက လမ်းပေါ်က ပြည်သူတွေကို ပြဿနာရှာတာကို သွားဆွဲရင်း တပ်ထောက်ခံပွဲမှာပါတဲ့သူတွေရဲ့ လေးခွနဲ့ အပစ်ခံရလို့ မျက်လုံးထုတ်ပစ်ရတာ။ မျိုးမင်းဦးတို့က NLD အားပေးတဲ့သူတွေဆိုတော့ အခုအချိန်မှာ ဒလန်တွေ ညှောင့်တာပေါ့”လို့ ပြောပါတယ်။

တောင်တွင်းကြီးမြို့မှာက နေရာတိုင်းလိုလိုမှာ စစ်ကောင်စီရဲ့ဒလန်တွေရှိပြီး လူငယ်အတော်များများဟာလည်း ဒလန်တွေရဲ့မဟုတ်မမှန် သတင်းပေးမှုတွေကြောင့် မတရားအဖမ်းခံရပြီး ညှဉ်းပန်းနှိပ်စက်ခံနေကြရကြောင်း ဒေသခံပြည်သူတွေဆီက သိရပါတယ်။