အာဆီယံဒေသတွင်း နိုင်ငံတွေမှာ  ကိုဗစ်-၁၉ ကြောင့် တရက်တည်း သေဆုံးသူပေါင်း ၅၅၈ ယောက်ရှိခဲ့ပြီး ဒါဟာ ပြီးခဲ့တဲ့ သီတင်းပတ် ၂ ပတ်တာကာလအတွင်း အမြင့်ဆုံးအရေအတွက် ဖြစ်လာခဲ့ပါတယ်။

ဒေသတွင်း ရောဂါကူးစက်ခံရသူအရေအတွက်ဟာလည်း ၄ ဒသမ ၅၃ သန်းကျော် လာခဲ့ပြီဖြစ်ကာ သေဆုံးသူစုစုပေါင်းကတော့ ၈၈,၁၁၉ ယောက်ထိ မြင့်တက်လာခဲ့တာပါ။

ဖိလစ်ပိုင်နိုင်ငံမှာတော့ တရက်တည်း ကိုဗစ်-၁၉ ရောဂါကူးစက်ခံရသူပေါင်း ၅,၈၀၃ ယောက်၊ သေဆုံးသူ ၈၄ ယောက်ရှိခဲ့ပြီး ဒေသတွင်း ရောဂါကူးစက်မှုအမြင့်ဆုံး အင်ဒိုနီးရှားနိုင်ငံနောက် ဒုတိယအမြင့်ဆုံး ဖြစ်နေခဲ့တာ ဖြစ်ပါတယ်။

အာဆီယံဒေသတွင်း ကိုဗစ်-၁၉ ရောဂါကူးစက်မှု အမြင့်ဆုံးနိုင်ငံအဖြစ် အင်ဒိုနီးရှားနိုင်ငံက ရောဂါကူးစက်ခံရသူပေါင်း ၁ ဒသမ ၃ သန်းကျော်၊ သေဆုံးသူပေါင်း ၂၃,၆၂၁ ယောက်နဲ့ ရှိနေတာပါ။

ဖိလစ်ပိုင်အစိုးရတော့ Pfizer ကိုဗစ်-၁၉ ကာကွယ်ဆေးသန်း ၄၀ ဝယ်ယူဖို့ သဘောတူလက်မှတ်ရေးထိုးထားတာဖြစ်ပြီး သီတင်းပတ် ၈ ပတ်အတွင်း ရောက်ရှိလာမယ်လို့ ဆိုပါတယ်။

ကမ္ဘောဒီးယားနိုင်ငံမှာတော့ တရက်တည်း ကိုဗစ်-၁၉ ရောဂါကူးစက်ခံရသူ ၆၅၉ ယောက်နဲ့ သေဆုံးသူ ၁၇ ယောက်ရှိခဲ့ပြီး ကူးစက်ခံရသူစုစုပေါင်း ၄၂,၇၁၁ ယောက်နဲ့ သေဆုံးသူပေါင်း ၄၃၁ ယောက်ထိ ရှိလာခဲ့ပြီ ဖြစ်ပါတယ်။

ဒီအထဲက ၇ ယောက်ကတော့ ဗီဇပြောင်းကိုဗစ်-၁၉ ရောဂါကူးစက်ခံရသူတွေဖြစ်တယ်လို့ ပြည်သူ့ကျန်းမာရေးဝန်ကြီးဌာနက ထုတ်ပြန်ထားပြီး အဲဒီထဲက ၅ ယောက်ကတော့ ထိုင်းနိုင်ငံမှာ အလုပ်လုပ်ပြီး ပြန်လာသူတွေဖြစ်တယ်လို့ ဆိုပါတယ်။

       မလေးရှားနိုင်ငံမှာတော့ ကိုဗစ်-၁၉ ရောဂါကူးစက်ခံရသူစုစုပေါင်း ၆ သိန်း ၉ သောင်းကျော်၊ သေဆုံးသူပေါင်း ၄,၄၀၈ ယောက်နဲ့ အာဆီယံဒေတွင်း ကူးစက်မှုတတိယ အမြင့်ဆုံးနိုင်ငံ ဖြစ်နေပါတယ်။

       ကိုဗစ်-၁၉ တတိယလှိုင်းကူးစက်ခံ ထိုင်းနိုင်ငံမှာတော့ ရောဂါကူးစက်ခံရသူစုစု ပေါင်း ၂ သိန်းကျော်၊ သေဆုံးသူပေါင်း ၁,၆၂၉ ယောက် ရှိလာနေပြီ ဖြစ်ပါတယ်။

       မြန်မာနိုင်ငံကတော့ ကိုဗစ်-၁၉ ရောဂါကူးစက်ခံရသူစုစုပေါင်း ၁ သိန်း ၄ သောင်း ကျော်၊ သေဆုံးသူပေါင်း ၃,၂၆၂ ယောက်နဲ့ အာဆီယံဒေတွင်း ကူးစက်မှု စတုတ္ထအမြင့်ဆုံးနိုင်ငံ ဖြစ်နေပါတယ်။