ရှမ်းပြည်နယ်၊ လွိုင်လင်ခရိုင် ၊ မိုင်းနောင်မြို့နယ်ထဲမှာ အာဏာသိမ်းစစ်တပ်နဲ့ ရှမ်းပြည်တပ်မတော် RCSS/SSA တို့ မတ်လ ၉ ရက်နေ့မနက်ပိုင်းက တိုက်ပွဲဖြစ်ခဲ့ပါတယ်။
RCSS/SSA တပ်ဖွဲ့ဝင်တွေဟာ မိုင်းနောင်မြို့နယ် နောင်အေအုပ်စု ဟိုတတ်ကျေးရွာမြောက်ဘက်ရှိ တောထဲမှာရှိနေစဉ် ညနေ ၄ နာရီလောက်မှာ မြန်မာ့တပ်မတော်က အလုံးအရင်းနဲ့ ဝင်ရောက် တိုက်ခိုက်တာကို ခံခဲ့ရတယ်လို့ RCSS/SSA ပြောခွင့်ရ ဗိုလ်မှူး ခမ်းစံက ဒီဗွီဘီကို ပြောပါတယ် ။
“မနေ့က မနက်ပိုင်းမှာ ကျနော်တို့က CRPH နဲ့ အွန်လိုင်းမှာ အလွတ်သဘောဆွေးနွေးခဲ့ပြီး ညနေပိုင်းကျတော့ မိုင်းနောင်အခြေစိုက် ခလရ ၉ နဲ့ ခလရ ၂၈၆ လက်အောက်ခံတပ်တွေက အလုံးအရင်းနဲ့ လာတိုက်လို့ ၁ နာရီကျော် ပစ်ခတ်ခဲ့ကြတယ်ခင်ဗျ။ တိုက်ပွဲက ပြင်းထန်တယ်လို့ ပြောရမယ်။ ဒါပေမဲ့ ထိခိုက်ကျဆုံးမှုအခြေအနေတွေတော့ မသိရပါဘူး။ ဒီနေ့မှာ တိုက်ပွဲမရှိပေမယ့် နှစ်ဘက်တပ်တွေ ဆိုင်နေတုန်းပဲ။ အဲဒါက တောထဲမှာဆိုတော့ ရွာတွေနဲ့ အလှမ်းဝေးပါတယ်”။
အဆိုပါဒေသမှာ RCSS နဲ့ SSPP တပ်တွေ တောင်ဘက်နဲ့မြောက်ဘက်ဆိုင်ပြီး ရှိနေကြောင်း ၊ မြန်မာ့တပ်မတော်က နှစ်ဘက်တပ်ကြားထဲကနေ သူတို့ကို ဝင်ရောက်တိုက်ခိုက်တာဟာ အဆင်မပြေဖြစ်နေတဲ့ RCSS နဲ့ SSPP နှစ်ဘက်တပ် အထင်မှား အမြင်မှား ဖြစ်စေလိုလို့ ဝင်တိုက်တယ်လို့ ယူဆကြောင်း ဗိုလ်မှူး ခမ်းစံကသူက ဆက်ပြောပါတယ် ။
“သူတို့က ကျနော်တို့နှစ်ဘက်တပ်ကြားထဲကို အဲလိုဝင်လာရင် ဟိုဘက်ကလည်း ကျနော်တို့က တပ်မတော်နဲ့ပေါင်းပြီး သူတို့ကိုတိုက်တယ်လို့ ထင်မယ်။ ကျနော်တို့ကလည်း တပ်မတော်နဲ့ SSPP ပေါင်းပြီးလာတိုက်တာလို့ အထင်မှားနိုင်တယ်။ တပ်မတော်က စစ်ရေးအရခွင်ဆင်တယ်လို့ ယူဆပါတယ်”။
ဖေဖော်ဝါရီ ၁ ရက်နေ့ စစ်အာဏာသိမ်းမှုအပေါ် RCSS/SSA တပ်ဖွဲ့က ဆန့်ကျင်ကြောင်း သဘောထားထုတ်ပြန်ပြီး နောက်ပိုင်း မိုင်းပန်၊ သီပေါနဲ့ မိုင်းနောက်မြို့နယ်တွေမှာ တပ်မတော်နဲ့ RCSS/SSA တပ်ဖွဲ့ကြား တိုက်ပွဲတွေဆက်တိုက်ဆိုသလို ဖြစ်ပွားခဲ့ပါတယ်။
လက်ရှိ စစ်အာဏာရှင်ကျဆုံးရေး ဆန္ဒပြနေတဲ့ ပြည်သူတွေ ဘေးအန္တရာယ်ရှိရင် RCSS ထံ ဆက်သွယ်ခိုလှုံနိုင်ကြောင်း ထုတ်ပြန်ထားပေမယ့် ဆန္ဒပြစစ်ကြောင်းနဲ့အတူလိုက်ပြီး လုံခြုံရေး ယူပေးတာတော့ မရှိသေးပါဘူး။
ပြည်သူတွေက စစ်အာဏာရှင်ကျဆုံးရေးဆန္ဒပြတဲ့အပေါ် ထောက်ခံပြီး ဖမ်းဆီးသတ်ဖြတ်ခံနေရတဲ့အပေါ် စာနာမိကြောင်း ၊ လက်နက်ကိုင်တပ်ဖွဲ့အနေနဲ့ ဆန္ဒပြစစ်ကြောင်းနဲ့လိုက်သွား ရင်တော့ အခြေအနေတွေ ပိုမိုရှုပ်ထွေးလာနိုင်လို့ ချင့်ချိန်ဆောင်ရွက်နေရတယ်လို့ ဗိုလ်မှူး ခမ်းစံက ပြောပါတယ်။
RCSS/SSA ဌာနချုပ် (ဓာတ်ပုံ - Hsan Mong)
